Bugun...



Zazaki rê peyê hefteyê do kulturın...
Tarıx: 24-01-2017 04:42:26 Newebiyayiş : 24-01-2017 13:04:26 + -


Peyê hefteyo ke vêrd ra, çımê zıwanê ma Zazaki ra zaf kulturın bi. Kıtabê, şarê ma u kulturê ma da nas kerdene, yew ki tiyatro bi..


Zazaki rê peyê hefteyê do kulturın...

No peyê hefteyo ke vêrd ra, Almanya u İstanbol de bara zıwanê ma de keyfweş, kulturın, rengın vêrd ra. No her wext hına raşt nêno. Zeman beno, be heftan, mengan/aşman heqa zıwan u kultur u senata ma sero theba nêno eşnawıtene (eşnaene), rocê ki qayt kenê ke xeberi jû raye de pêsero ameyê. Eno peyê heftey (20.-21.01.2017) ki no qeyde ra bi.

 

Se ke ma nae ra dı aşmi ra aver ki xeberanê ma de mijdania xeyre day biye şıma ke nezdi de kıtabê Ap Ali Dikmey veciyeno; peyniya peyêne de hefteyê ra zêdeo ke Kayhan Matbaacılık de be peştia Ali Ülgeri (Kızılbaş Ali) İstanbol de veciya. Namey kıtabi “Gulvang u itıqatê Kırmancu”no. Kıtab de mae ra biyaene heta merdene, Dêsım de adet u tore u gulbanganê Zazayanê Elewiyan (Dêsım de êyê ke vanê ‘Kırmanc’) sero nıqırnao, kerdo tezba ra; be na qeyde ki Ap Ali xezinê da zaf menidar u dewletiye ma rê verdawa. Çûnke tenya zıwanê ma Zazaki (Kırmancki) nê, adet u tore u itıqado otantiko verên ki roc be roc xo vira beno, viria şari ra veciyeno; heruna ninan ki Tırki u itıqadê teberi gêno. Mordem roca ewroyêne de vacime ke yew/jû piro ke be zıwanê xo cem gırê dano, nêşeno bıvêno. Hema hema kes endi be Zazaki veng’a Heqi nêdano, gulbang nêdano, dua nêkeno, mare nêbırrneno, kal u kokıman ra ğeyr endi kes fecirê şodıri de tici vera mınete nêkeno. Şarê ma de itıqad u kultur kewtê têzerre, mordem nêşeno ninan pê ra abırrno.

İtıqad u din sero fıkrê ma hergu yewi çı beno, bıbo; insan gani na mesela de bêhet niya do (bewno). Ewropayıcê cıgeyraoği u mordemê ilmi ke şonê duwelan de geyrenê, qewm u qebilanê verênan ke vênenê, zıwan u zagon u ray u xuy u heysiyeti u çı ke di, gênê qeyd ke wa hem vındi mebo hem ki alem cı ra xeberdar bo, şarê na dınya yewbini bışınasnê.

 

Nuskar Ali Dikmey, be peştia Bahar Kızıl u Veli Kişioğlu ra, pêserardene de ğeyretê Dr. Mag. Zeynep Arslane ra, roca 21ê Çeley 2017ıne, yene, İstanbol-Şirinevler de, café Herdem Demxane de, be mekandariya senatkar Gule Mayera ra ey kıtabê xo sıfte uca da nas kerdene. Roca bine ki, 22yıne, roca şemiye de, be mekandariya Zaza-Deri ra Beyoğlu de nasdaena kıtabê xo arde herune (hurendi, ca). Her çıqas ke şarê ma hewna wendışê kıtabi ra, hele ke zıwanê xo ra wendış ra daêna dûri bo ki, rocê nê rocê qıymetê kıtabanê ma pêrıne rındêr zaniyenê. Xort u gêncan de meraxê do hewl esto. 

 

 

 

 

Roca şemiye (21.1.) Almanya, sûka Mannheimi de, jû şênatiya belediya de Roca Mirasanê Kulturan de Roca Mirasanê Kulturan de Zazay ki day şınasnaene/nas kerdene. Psikolog Hesen Dewran, Avukate Fidan Ulucan Kılıç, Resam Kemal Celik, nuskar Haydar Sahin u gırwekarê kulturi’ê bini ki uca şarê xo, kultur u zıwanê xo pê deyr u kılame, pê şıir, pê resım day şınasnaene, melumat da. A şênatiye de 160 şari day nas kerdene, hergu yew rê 5 deqey bırrnaê a. 

 

 

Zey pari emser ki koma tiyatroy Areyê Kay ray u olağanê dûri eşti peyê xo, xeylê sûkanê/bacaranê Almanya de sehne gırewt. Emser be kayê xo “Bekçi” kaykeri Yılmazcan Şare, Fintoz Dikme-Yıldırıme u Musa Oktay amey, mılet vıst huwayış. Roca paşemiye Frankfurt de, roca yeniye Rüsselsheim de, roca şemiye (peyê yeni) ki Darmstadt de şarê ma zaf bi şa ke pê zıwanê ma u piyê xo tiyatro seyr kenê; bol ki pê huway (huyay). Kayê Bekçi de na raye ki anci zıwan u kultur sero mesaci tey est biy. Hetê ra dewlete dılqê komserê de şar u zıwanê Zazaki qıc vêneno. Komseri saet reyê wexto ke bekçi vat “Zazaca”, ey ki “ben anlamam o zart-zurtçadan” vat, vaciya pede. Fintoz Dikme-Yıldırme dılqê jû cenıka kokıme de ki mocna ra (musna) ke zar u zıwanê dewlete ke nêzanê, senên çetıniye tey ancenê, nêşenê derdê xo vacê, gerrey xo bıkerê. Na qısa de tey na ki amê zıwan ke, cem u cemaetê veri ke cê bırriya, dariya we, endi kesi ke pir u rayber tede nêkerd, zıwanê xo ke pê thız u kayê dewlete, xo be xo rê kerd tomete, kal u kokımi ki mecbur kewnê zıvıngan u bertenganê qereqoli; anorê cı tey şıkiyeno. Oyo ke rolê komserê dewlete tey bi, kay de Tırki ki qısey bi. Rolê bekçi de Yılmazcani Şare dı zıwanan de qısey kerd; ya ki mordem gani vaco zıwanê u nêm, çıke Tırkiyê nê figuri nêmecet u kırtki bi, Zazaki ki xeylê kerdêne miyan.

Tesirê tiyatroy wertey mıleti de ki asa ke kay ra tepeya tebera u xo miyan de ki be zıwanê xo muhbet kerd u pê zıwanê xo de senate bi şa, cı ra bi zerreweş.
 

 

Mordem qailo ke her peyê heftey ma zey nê peyê heftey bo; her tım pê kultur u senate pırr bo. Çûnke mıletê, na dınya de ke wahêrê senate nêbi, eke be xo ber (ürün) nêvet, xo aver nêberd, eke qedr u qıymet nêda xo, eke bınê şaranê dınya de xo beli nêkerd, ra nêmot, eke xo ra inkar bi, zey vatena şairê ma Sey Qaji, toz erzeno rêça xo, sono. 




Editör: Mesut Asmên Keskin

Na xebere 623 rêy amê wendene

Etiketi :

FACEBOOK FIKIRNAYİŞ
FIKIRNAYİŞ

ZONÊ MA XEBERÊ BİNİ

XEBERÊ ZÊDÊRİ WENDİYAYÊ
FIKIRBİYAYÊ PÊÊNİ
FOTO GALERİ
  • Guelê Quling (Yüzenada) - Çolig (Bingol)
    Guelê Quling (Yüzenada) - Çolig (Bingol)
  • Zımıstanê Welati
    Zımıstanê Welati
  • Çımê Muzıri
    Çımê Muzıri
  • Koê Welatê Ma
    Koê Welatê Ma
  • Mezelê Ma
    Mezelê Ma
  • Bonê Domantênya Ma
    Bonê Domantênya Ma
  1. Guelê Quling (Yüzenada) - Çolig (Bingol)
  2. Zımıstanê Welati
  3. Çımê Muzıri
  4. Koê Welatê Ma
  5. Mezelê Ma
  6. Bonê Domantênya Ma
FOTO GALERİ
YUKARI