Bugun...


Xal Çelker


Facebookta Paylaş









Kuba-İbre
Tarıx: 21-08-2016 22:15:00 Newebiyayiş : 21-08-2016 22:15:00


Nê, nê mı ğelet nênusna. Ez qalê Kuba Libre nêken. Xora Kuba ke va, alkolanê Kuba ra Kuba-libre meşuro, êno zafine viri. Ez wazen tenê qalê weşiya Kuba bıkerine. İbrê xo kamci het ser dano pıro, ae ki şıma araze kerê.

 

1492ine de Kolombus Kuba kefş keno! İspanyoli ênê Kuba istila kenê. Qomê ocayo khan, yanê bejnesura cênê bınê bandıra xo. 1512ine de Baracoa de sıfte kenê, wertê dı serra de İspanyoli suka ra Santiago de Cuba, Bayamo, Trinidad, Camagüey, Sancti Spiritus u Habana vırazenê. 
Bêhemd qamişê şekıri u tutın ramenê. Waxt ra ebe rotena şekır u tutıni hem benê dewleti hem ki benê namdar. Ewro ke puro vaciya, Kuba dekerina. Ebe na dewlemendiye sukanê bina vırazenê, serra 1552ine de Habana (Havana) kenê paytaxtê Kuba...

 

Nia ênê resenê serranê 1900. 
1950 ra tepia dewlemendê Kuba Hemilka (Amerika) ra Şevroleta danê ardene. Ebe nê ereba kef u sefa xo ramenê. Hona Kuba de nê erebewê ke baronanê İspanyola Hemilka ra dê ardene, estê. Çıxa ke nê serranê pêêna de marqanê bina ra ki taê erebey estê ki, gıraniyê ni Şevroletanê khana dera. Ambargoê Hemılka ra tepia motorê Mercedesi dê ardene, kerdê cı, reng be reng, qat be qat boyaxa ra boyax kerdê, ebe a qeyde hona nê ereba ramanê.

 

Ma se biyo? 
Çıxa ke mavênê serranê 1868 u 1878ine de xoverdaena xoserbiyena Kuba biya ki, nêbiyê serfiraz. Ancax 1886ine de koletiye dariya we. 
Fidel Castro, Che Guevara ideologê sosyalizmê Kubaê. Nê ideologi olvazanê xo ra pia bıngê xoverdaena xoserbiyena Kuba 26.07.1953ine de erzenê cı. Serrê serra 1958-59ine de ki Kuba kenê serfiraz. Hona serfirazê. Hama, ê na serfiraziye ki ze jü madalyoni dı rüyê xo estê.

Heto jü de ebe hokmat xo dest guretene bêkariye u feqiriye (o waxt ra gore), darda we, manê kerxani de gurenaişê hermetu kerdo tomete, têduştiya cêni be cüamêrda hasıl kerda.

Xoseriya Kuba ra tepia têde qomê ke Kuba de weşiya xo ramenê, biyê têduşt. Yanê ferqa wertê sia u sıpêy be esmera nêmenda. Mıletê Kubao khan bejnesuri, siaê ke Afrika ra waxtê waxta de dê ardene, ê be İspanyola ra têduşt de ebe haştiye weşiya xo ramenê. Jümini ra zewecinê, weşiya sosyale de têwerte derê, itıqatanê xo gorê waştena xo ramenê. Zaf mıletê de haşto, zereweşê.
 

Zaf qimet do wenden u nustene. Keso ke bêwendiş u nustiş bo, çino. Hata sınıfa 9ine mektebe şiyene mecburiya, bêperewa. Domani zêdêri mektebanê dewlete de manenê, werd u şımıtena ina, têde xerc u mısrefê ina dewlete cêna xo ser. Kesê ke lise ya ki universite wanenê, dewlete ra phoşti cênê. Toxtorê Kuba meşurê. Tedawi biyene, xestexane şiyene têde Kubaica rê bêperewa. İlaci ucızê. 
Heto bin de,

zonê khani hama hama ke biyê vindi. Têde İspanyolki qesey kenê. Sebeta pay ra mendena zonanê bina bıcê ke qe karê nêkerdo.

Cısnbaziye (rasizm) darda we, hama kultur de heni ravêr nêşiyê. Dewlemendê xuyê nê serranê pêêna dı-hirê qor zincıla zernêne be honde nalê astora zerna erzenê xo vılê. Pêro pia şan – şodır şımenê, çı ke werd, xo dıma erzenê. Ne çopanê xo danê are, ne ki pakê. Kamci het de ke nia dana, qutiyê biri be şüşê rumi estê.

 

Kılmek ra ke vaci, “devrim/revolution” ra nat ebe muzik u alkol roc u serri viyarnê ra. Heni ke kêfweşê, çı taw ke vengê muziki bıheşnê, desınde qıne erzenê we! Bon u qonağê ke baronanê İspanyola vıraştê, ya gınê pıro ya ki gınenê pıro, biyê, ya ki benê pagi. Unescoy dest eşto cı, ca be ca tamir kenê. Hawt-heşt mordemi jü baraqa ya ki bon de manenê, hama dêsê ke süağê xo rıjiyo, vıraştene nêna re kesi viri. Zaf rehetê, tığalê.

Manê demokrasi de çıxa rae gureta, nêzan. Hama, Wikipedia ra gore roca werteardena parlamentoy ra nat têde qerarê parlamentoy jü veng ra amê guretene. Qe waxtê jü reyê de “nê” nêveciya. Castroy ra tepia hokmat bıraê dêy gureto xo dest!..

 

Ancia ki vanê Kuba moreka Karibikia xasa. Ebe qumê xuyo tenık u hurdi, rengê xuyo hewzo kesk ra deryaê xuyê Atlantiki zaf xaso, bêemsalo. Mordem beno maşıqê cı. Manê weşiya sosyale de ita Avrupa, Afrika u Amerika kuna têvırare.

 

Rınd ya ki xırab, wertê nê 57 serra de Kuba de honde çi biyo. Ma hardê Anadoliye sero se biyo?
Ronaena dewleta Tırki ra tepia, 
• ideolojiyê Tırk-İslami ra qeyr qe jü fikriyati rê çêverê rame nêbiyo ra. 
• Qe jü qomi xoseriye tham nêkerda. 
• Têde qomê Anadoliye ya werte ra dardê we, mefi kerde, ya ki kerdê bındest, 
• serbestiye biya eşkıja Paloy.

Verba na nêheqiye serranê 1960 ra nat dezgey cêriyê de, “örgüt”i şaniyê pê. Taine vato, ma xort u azeba ra pia “devrim” kenime; taine vato, ma gurekara ra pia devrim” kenime, taine ki vato, ma dewıca ra pia devrim” kenime. Yanê na 50-60 serre de ke nia dime, vinenime ke gamê rae nêcêriya. Ne “devrim” amo ne ki mezgê mıleti biyo ra. Weçinıtena mebusa de reya ke “devrimci”ya gureta, derya de dılapa bile niya:

HKP - Halkın Kurtuluş Partisi 0,18 %,

KP - Komünist Parti 0,11 %,

BGZ - Bağımsız Toplam 0,11 %.

“Milli Görüş”i bile ebe kar u gurê xuyê 25-30 serra hokmat guret xo dest. Ma hona “devrim” kenime!

“Örgüt”i hona ki vanê, ma dewlete rıjnenime, devrim kenime. Hama MİT, esker u polêsê dewlete ra zêdêri bınê namê “ajan”, “istihbaratçı”, “işbirlikçi” ra qomi ra isana kişenê.
Kiştena Erkan Doğani ki nina ra jüya...

Mordem ke xo ra kewt düri, bê fam u fıreset ke kewt ra “devrim” dıma, cı rê hona zaf nonê fırno germın werden u doo tırş şımıtene wacım kena...

Honde serra ra tepia çı destê ma ra veciya şi, çı kewt ma dest? 
Kar u zerarê dae ki şıma hesab kerê!

Ebe selam u rumet bımanê weşiye de.

 

Xal Çelker
10.08.2016

 



No nuste 1079 rêy ame wendene

FACEBOOK FIKIRNAYİŞ
FIKIRNAYİŞ

NUSTÊ NUSTOĞİYÊ BİNİ

XEBERÊ ZÊDÊRİ WENDİYAYÊ
NUSTOĞİ
FIKIRBİYAYÊ PÊÊNİ
FOTO GALERİ
  • Guelê Quling (Yüzenada) - Çolig (Bingol)
    Guelê Quling (Yüzenada) - Çolig (Bingol)
  • Zımıstanê Welati
    Zımıstanê Welati
  • Çımê Muzıri
    Çımê Muzıri
  • Koê Welatê Ma
    Koê Welatê Ma
  • Mezelê Ma
    Mezelê Ma
  • Bonê Domantênya Ma
    Bonê Domantênya Ma
  1. Guelê Quling (Yüzenada) - Çolig (Bingol)
  2. Zımıstanê Welati
  3. Çımê Muzıri
  4. Koê Welatê Ma
  5. Mezelê Ma
  6. Bonê Domantênya Ma
FOTO GALERİ
YUKARI