Bugun...


Veli Kişioğlu


Facebookta Paylaş









Katıvênia domonêni
Tarıx: 19-02-2017 23:10:00 Newebiyayiş : 19-02-2017 23:10:00


Ez ke domon bine, maa mı ve piyê mı ra veng’a mı dêne, vatêne „bê, waa xuya Almanya rê mektuve yazmıs ke, bınusne. Mı mektuve nusnaene ra qe has nêkerdêne, qe nêwaştêne ke i veng’a mı derê, vazê “bê, mektuve bınusne“.
Mı satê maneyê diyêne, ge vatêne “dersa mı esta“, ge vatêne “satêna nusnen“, hama xo nêxelesnêne, mecbur şiyêne, nusnêne. İnu Tırki nêzonêne, Zonê Ma qesey kerdêne; mı Zonê Ma çarnêne ve Tırki, mektuve nusnêne. Mı rê zaf çetın amêne. Mı ke vatêne “mı rê çetın yeno“, maa mı ve piyê mı, mı ra herediyêne; vatêne “ma sıma rusnay mektev ke, xêrê sıma ma reso, serrê de reyê vame, jü mektuve bınusne, sıma goni kenê owe. Ma sıma ra nêva ke, kemere boncê, sıma kemere nêoncenê; qeleme kenê xo dest, mektuve nusnenê. Sıma ke ma ra qeseyê vanê, ma keme. Qeleme vanê, qeleme cême; kıtav vanê, kıtav cême; postal vanê, postal cême; xo rê nêcême, sıma rê cême.”
Ez kufêne, kufêne, mı vatêne, “temam ya”, xete ve qeleme ra guretêne, amêne, vatêne “temam, vazê, ez bınusnine“.

 
Heto jü de maa mı, heto jü de ki piyê mı niştêne ro, inu vatêne, ezı ki therpu merrediyêne ra, nusnêne.
“Değerli-kıymetli kızım (Çêna mın’a delale), tı ke ma pers kena, Heq’a sıkır, ma pêro ki rındime; pêro ki to rê düaçime. Tı çıturia, se kena, domoni çıturiyê, zama çıturiyo, sıma zaf kuti ra ma viri, sıma jê düy pırnıkunê ma ro sonê. Cigera’m, ondêro tali u tezel nia biyo, ma jüvini ra fiştime ra düri, eştime peyê howt duwelu, tersa’m çıke, rozê ke bımırime, çımê ma ki meyitê jüvini nêgıneno. Oncia ki na mektuve esta, serrê de reyê jüvini ra jü xevere cême. A mektuve ke heta ke bıraê to rê dame nusnaene, vezeno verê gulia ma. Vano ‘sıma Tırki nêvanê, ez bese nêken zonê ma bıçarnine Tırki, bınusnine’, ma se bıkerime, ma ki Tırki nêzoneme. Cigera m’, hesa to ra, ma ra gınê waro, pê ma qail nêbenê. Boliye dare ra gına waro, pê dare qail nêbiya, vato, ‘tı zıvırına, gızkına, ez ozaune’, nıka biyo na fênde.

 

Mı xo xo de vatêne ke “ni ma u piyê mı çae Tırki qesey nêkenê? İ ke Tırki bızonê, ez mektuve daêna rındek nusnen”, sıma ve Heqi kenê ke, sıma rê darê Heqi nan ro, domono heşt serre çıturi honde qesu zonê ma ra bıçarno zonê Tırki? Endi mı desteber ra çıqaşi ke amêne, mı çarnêne. Qesê dinu ve çarnaisê mı ra qe jüvini nêguretêne. Sıma rê jü mısal qesey bıkerine. Mısal, inu zonê ma vatêne ke “sıma jê düy pırnıkunê mı ro sonê, zaf kuti ra ma viri”, mı ki nusnêne ke “siz duman gibi burnumdan gidiyorsunuz, sizi çok özledik”. Heq raji bo ke waa mı zonê ma rınd zonêne, şiyêne ra ser ke inu se vato, mı çı nusno. Belkia ki xo ve xo huyiyêne.
 

Nıka waa mı zonê ma zonena, ma u piyê mı ki zonê ma zonêne; eke amey têhet, zonê ma qesey kerdêne; nıka sıre ke ame mektuve, ça zonê ma de nênusnêne, ilam ke Tırki nusnêne? Ma keşi ki heta o waxt nêzonêne ke zonê ma yeno nusnaene; yê zonê ma ki alfabê xo esto, gramerê xo esto. Ma Tırki de universıte wend, hama zonê xo de bese nêkerdêne thowa bınusnime. Honde ke zonê ma ra kerdime zerreserd, zonê ma honde ke ma çım de kerd bêqimet, ma thowa era xo viri nêardêne. Dewleta Tırki ke se vatêne, ma bêsorği u bêsual ima’ biyêne.
 

Nêyse ke, daasê serrê bini mı mektuve nusnê; Heq raji bo ke têlefon ame, hergı çêyi ra têlefon gırê da, endi mektuve nusnaene cê vışiye, endi jüvini de têlefon de qesey kerdêne, Heq Graham Belli ra raji bo. Keşkia ke nıka ma u piyê mı wes bıbiyêne, mı ra bıvatêne; bê, mektuve bınusne. İ qesê weşi; i çekuyê ke zerria dinu ra xeleşiyêne ra, amêne; mı i heve ve heve bınusnêne; A qeseykerdena wese ra ail-mail bımendêne.
 

Dewleta Tırki teyna bonê ma nêrıznay, dewê ma nêvêsnay; binatê roê ma, kamiya ma ki rıznê. Ez serva ma u piyê xo, serva xo, serva domonunê xo, serva tornunê xo dawaçine dewleta Tırki ra.



No nuste 421 rêy ame wendene

FACEBOOK FIKIRNAYİŞ
FIKIRNAYİŞ

NUSTÊ NUSTOĞİYÊ BİNİ

XEBERÊ ZÊDÊRİ WENDİYAYÊ
NUSTOĞİ
FIKIRBİYAYÊ PÊÊNİ
FOTO GALERİ
  • Guelê Quling (Yüzenada) - Çolig (Bingol)
    Guelê Quling (Yüzenada) - Çolig (Bingol)
  • Zımıstanê Welati
    Zımıstanê Welati
  • Çımê Muzıri
    Çımê Muzıri
  • Koê Welatê Ma
    Koê Welatê Ma
  • Mezelê Ma
    Mezelê Ma
  • Bonê Domantênya Ma
    Bonê Domantênya Ma
  1. Guelê Quling (Yüzenada) - Çolig (Bingol)
  2. Zımıstanê Welati
  3. Çımê Muzıri
  4. Koê Welatê Ma
  5. Mezelê Ma
  6. Bonê Domantênya Ma
FOTO GALERİ
YUKARI