Bugun...


Hüseyin Şimşek


Facebookta Paylaş









Usar, ebe xasxasıku beno har!
Tarıx: 31-05-2017 14:51:00 Newebiyayiş : 31-05-2017 15:19:00


Domanênia mı de -xona ke ez nêşiyêne wendisxane (mekteb)- eke usar ama, ma çairu, hêgau, xozanu, kas u kuçu de biyêne guvıke. Çıra? Çıke, ma hard ra xêlê zarzawet u yemışi dêne arê, werdêne. Sosıne, xasxasıke, xole, kulıre, morsınge, kenger, zore, rıbêşi, tırsıke… Hetê dewunê ma de usar ke ama, ravêr ni veciyêne. Ni yemışi pêru vasu raê.

 

Sıncıku be daru tenêna peyco yemıs dêne. Dırrıke, mamuxe, kiraze... Mı ra ke pers kenê, ni yemısê sıncıkanê. Ni zarzawetu ra tepia, yemısê daru ra ravêr veciyêne. Muriye, sae... Hetê dewunê ma de darê ke yemıs danê, xêlê nêbiy. Jü darê muriye, jü ki darê sau ma nas kerdêne.

 

Vore ke gıran gıran vılêşiye ro, raştun u kasu ra onciye ra, teyna gılê koo de belek belek mende, u dem ravêr sosıni veciyêne. Ma ninu ra “gulsosın” ki vatêne. Dewa ke ma tede weşiya xo ramıtne (Têrcan/Yabanciye), çair u koonê a dewe de sosın nêveciyêne.

 

Ez çı waxt ke dewa khalık u bavıkanê xo Pelegoze de şiyo wendisxane, mı sosıne uca diye, nas kerde, werde. Na dewe de sosınê xurti hetê çairunê Koê Qereqaya de veciyêne. Qereqaya, peyê wendisxani de mendêne. Hama heni xonde ki nejdi nêbi. Ma xona doman bime, gorê ma xêlê düri ra bi. Pêsê ni Koê Qereqaya zafêri kaç u kuç bi. Ucau de hêga u çairi senık biy. Ez qe xo vira nêkon: Ma gegane wendisxane ra remêne, şiyêne hetê Qereqaya, hem vora ke biya yê moreku hem ki sosıni werdêne.

 

Dewa ma Yabanciye, qırtıkê Koê Madeni be Koê Kulliciye de mendêne. Qırtıko ke peyê/corê dewe de maneno, zafêri ebe çairune dergu gıpnae bi. Wertê ni qırtıki ra jü ağwe (dere) şiyêne. Çımê ni deri Çairê Viyale de bi. Çairê Viyale, u het de çairo peyên bi. U qırtık peyê dewe de qediyêne.

 

Dewe ra dıma jü raşte biyêne ra. Nu raşte hatam Çhemê Tuzla, lınge be lınge biyêne hira. Her caê xo hêga bi. Raşte ebe hêgau gıpnae bi. Her jü usar, hegaê ke ni raştey derê, ino ra tenêni xozan verdêne. Nêramıtêne! İ xozani usar ke ama, biyêne har. Biyêne ambarê xasxasıku, kulıru, morsıngu. İ yemısê bini (xole, kengere, zore, rıbêşi, tırsıke) ma hetê Koê Madeni de dêne arê.

 

Ez wazon ke xasxasıku ser qesê xo tenê derg bıkeri. Ma kotiê xasxasıku, çutır verdêne? Hirê demê xasxasıku estê: Demê gıli, çıçege u yemıs. Ma xasxasıke ni her jü demu de ki werdêne. Sıtê xasxasıke zaf zeleqino. Hemı k’ eke gına dest u kıncu ra, zaf heri vecino ya ki sono. Dest u lewê ma biyêne sıng-şia.

 

Jü ki kayê ma bi, xasxasıku ser. İ gılê ke xona ra nêbiyê, i cıra kerdêne, guretêne destê xo, havalê xo ra pers kerdêne: “Zerrê ni gıli de kamci reng esto?” Çıçega xasxasıke ke xona ra nêbiya, zerrê gıli de zaferi sura. Hama gegane ki rengo sıpê, zerd, pembe dera. Ma zafêri “sur” vatêne. Gegane jü rengo bin veciyêne.

 

………………………………………………………………….
huseyin.simsek@gmx.at, Gulane 2017

 

 

 



No nuste 304 rêy ame wendene

FACEBOOK FIKIRNAYİŞ
FIKIRNAYİŞ

NUSTÊ NUSTOĞİYÊ BİNİ

XEBERÊ ZÊDÊRİ WENDİYAYÊ
NUSTOĞİ
FIKIRBİYAYÊ PÊÊNİ
FOTO GALERİ
  • Guelê Quling (Yüzenada) - Çolig (Bingol)
    Guelê Quling (Yüzenada) - Çolig (Bingol)
  • Zımıstanê Welati
    Zımıstanê Welati
  • Çımê Muzıri
    Çımê Muzıri
  • Koê Welatê Ma
    Koê Welatê Ma
  • Mezelê Ma
    Mezelê Ma
  • Bonê Domantênya Ma
    Bonê Domantênya Ma
  1. Guelê Quling (Yüzenada) - Çolig (Bingol)
  2. Zımıstanê Welati
  3. Çımê Muzıri
  4. Koê Welatê Ma
  5. Mezelê Ma
  6. Bonê Domantênya Ma
FOTO GALERİ
YUKARI