Bugun...


Hüseyin Şimşek


Facebookta Paylaş









Mao ke xêlê zonanê binu zoneme, zonê xo ki wazeme!
Tarıx: 30-03-2017 15:28:00 Newebiyayiş : 30-03-2017 15:28:00


Serra 1987ine ra nat bi, ez İstamol de perlodu, rocnamun u radonu de guriyêne. Wertê des serru de i xeberê ke mı nusnay bi, pêru nêheqêni, hepısêni, zulımkarêni sero bi. Nu are de dewlete heqa mı de xêlê mekemi kerdi bi ra. Avkatê mı rocê mı ra vat ke, “i mekemê verêni de tı hepıs êena”. Mı nêwaştêne, mı reyna berzerê hepıs! Roca dıyê Gulane 1997 amo Austriya. Çıke, ma u piyê mı, bıra u waanê mı xêlê serro ra nat bi ke Viyana de weşiya xo ramıtêne. Dı asmu ra tepia, mı dıma jü serre hepıs, 110 milon ki ceza peru amê. Bêçare mendo, nêçerexiyo İstamol, Viyana de mendo. Des serri qe neşiyo welat!

 

Austriya de ez ğeribênia dı zonu de biyo endi: Tırki be Almanki! Xêlê zonu musaene, zonaene çiyo de xırabın niya. Mı jê Tırki, Almanki ra ki hes kerd. Hama, mı zonê xo ki tepia waştêne! Austriya de zonu rê tomete çinê biye. Her kesi ververê Almanki de zonê xo ki qesey kerdêne. Xêlê zoni wendisxanu (mektebu) de amêne wenden u nuştene. Ma, ma çıra zonê xo qesey mekerime, mewanime?! Çand serrunê xo de, kamci duwelu de beme, bıbime, ma gereke zonê xo ki bıwaştêne. Mı ki Viyana de heni kerd.

 

Viyana de serra 2005 de, komala KOMKAR-Austriya dest eşti bi “Pêşengeha Pırtûken Kurdî Ya Li Wienna”. Nu kar, serre de jü raye, wertê asma Nisane de ardêne pêser. A serra verêne, mı zonê ma de dı-hirê sıiri wendi. Serra dıyine, uncia zonê xo de jü cıgêrayiş ard zon ver. Ebe nu hal, mı endi gıran gıran ebe zonê xo ki çiyê kerdêne. Nıka, ebe zonê xo ki sıiru nusnen.

 

 

zonê mı ama zonê mı ver

 

jü rocê, zonê mı ama zonê mı ver

de vanê, mı qe qesey nêkerdi bi

a roce ra raver

 

jü rocê, zerria mı amê zonê mı ver

de vanê, zerrê mı thıp u thal bi

a roce ra raver

 

jü rocê, qesê de newi amay zonê mı ver

qe jü qesey kerdene nia xonde her çi nêbi bi

a roce ra raver

 

jü rocê, emrê mı ama zonê mı ver

çar rey biyo doman, biyo kokım

mı qe emrê xo nia xonde teze nêkerdi bi

a roce ra raver

 

jü rocê, zonê mı kuyt her çi ver

wortê dı lewo ra xeleşiya ra, bi her çi

her çi bi zonê mı

ez qe xonde xo nêbiyo

a roce ra raver

 

 

 

Eke mı dest ra bıamêne, dina de çıxa zoni estê, inu pêruno musêne, qesey kerdêne. Kamci zon ke bınê tometêni u zulımkarêni dero, i rê wayir bıvecime. Ma pêru pia, hama her jüyê ma zonê xo de reyna, reyna, reyna vacime: Zonê xo ki wazon!

 

 

 

www.huseyin-simsek.com

huseyin.simsek@gmx.at



No nuste 568 rêy ame wendene

FACEBOOK FIKIRNAYİŞ
FIKIRNAYİŞ

NUSTÊ NUSTOĞİYÊ BİNİ

XEBERÊ ZÊDÊRİ WENDİYAYÊ
NUSTOĞİ
FIKIRBİYAYÊ PÊÊNİ
FOTO GALERİ
  • Guelê Quling (Yüzenada) - Çolig (Bingol)
    Guelê Quling (Yüzenada) - Çolig (Bingol)
  • Zımıstanê Welati
    Zımıstanê Welati
  • Çımê Muzıri
    Çımê Muzıri
  • Koê Welatê Ma
    Koê Welatê Ma
  • Mezelê Ma
    Mezelê Ma
  • Bonê Domantênya Ma
    Bonê Domantênya Ma
  1. Guelê Quling (Yüzenada) - Çolig (Bingol)
  2. Zımıstanê Welati
  3. Çımê Muzıri
  4. Koê Welatê Ma
  5. Mezelê Ma
  6. Bonê Domantênya Ma
FOTO GALERİ
YUKARI