Bugun...


Hüseyin Şimşek


Facebookta Paylaş









Karê ke çımanê ma de bereqiyêne
Tarıx: 19-02-2017 18:43:00 Newebiyayiş : 19-02-2017 18:43:00


Hatam peyniya mektebê wertêni, karê ke çımê mı de bereqiyêne, zaf nêbi: Maylımêni, toxtorêni! Eke xona dewe de wendêne, çımê mı maylımêni de bi. ‘Yatıli’ de nu hewesê mı gıran gıran vuriya. Uca jü kıtabxane bi. Waxtê mektebê werti de sermiyanê ni kıtabxani ez biyo. Sebeta ni mesuliyeti, wertê i hirê serro de, mı havalanê xo ra zaf kıtabi wendi. Hem zaf kıtabi wendêne, hemı ki amnon ke ama, şiyêne İstamol. Cokra, Tırkiyê mı zafine ra rınd bi. Dersa Tırki de nustê derse zafêri mı wendêne. Bayramo de ki mı xêlê sıiri ezber kerdi bi u wendi bi. Nu hal ra mı gıran gıran “maylım biyaene” kerde xo vira. Toxtorêni çımê mı de qe çinê biye. Meyl u hewesê mı, nuştoğêni u şairêni sero bi endi!

 

Jü defterê mın’o xemelnae bi: Defterê Xo viri ardene! Ez i defteri xona dan we. Kılamê ke u waxt mı cı ra hes kerdêne, i nuşti bi ni defteri. Kılamê Mahzuni Şerif u Muhlis Akarsu, Ali Kızıltuğ, Ali Sultan, Abdullah Papuri... Sıma ki zonenê ke peyniya her jü kılame de, hunerbendo ke a kılame nuşta, namê i ca cêno. Mı u cao ke namê hunerbendi yeno vatene ya ki amo nuştene, namê xo kerdi bi cı ya ki nuşti bi. Havalo ke no defter wendêne, misal vacime, hurendia namê Mahzuni de namê mı diyêne, tenê zaravi kerdene, huyêne. Tenê aqıl dêne mı: “Coro nia beno, ni kılami yê tu niyê ke, tu çutır namê xo nusnena?!” Ez endi doman nêbiyo, hama sıma pêru zonenê ke aqılê gêncênia verêne ki aqılê cailênio! Mı u aqılê cailênia xo ca verda. Hama hilê mı i defteri de mend.

 

Mı serra 1977ine de mektebê ‘Yatıli’ qedêna. Endi weşiya xo çê xo de, İstamol-Tuzla de ramıtêne. Ez berdo ‘Tuzla Lisesi’ de qeyd kerdo. Eke İstamol de mı mektebê lisa de sıfte kerd, nuştene de kewto demo newe: Mı gıran gıran uncia jê i kılamo, hama endi xo be xo nuştêne! Nu are de mı kıtabê hunerbendanê bino nas kerdi: Yakup Kadri, Halide Edip, Sait Faik, Halid Ziya, Reşat Nuri, Kemalettin Tuğcu wendene mı ca verda. Nu demo newe de kıtabê Fakir Baykurt, Yaşar Kemal, Kerim Korcan, Orhan Kemal, Nâzım Hikmet, Ahmed Arifi kerdi xo dest. Mı waştêne ke jê ni nuştoğu be sairo bınusni; hêkato, romano, sıiro...

 

Mektebê lisa de serra dıyine biye. Mı sebeta jü sıira xo jü halete gurete. Heto bin de mı jü ki roman nuştêne gıran gıran. Mektebê lisa ki qediya, 1979 de ez kewto imtanê universta. İmtanê serra verêne de caê ke mı waştêne, heq nêkerdi bi. U puano ke gureti bi, ebe i puani mı İzmit de muhasebeciyêni wendene şikiyêne teyna. Şiyo, mekteb di, hama qe qail nêbiyo, zerrê mı ra niama uca bıwani. Mı xo qeyd nêkerd, çerexiyo, amo çê. Ma u piyê xo ra nia vat: “Ez wazon ke serrêna uncia imtan bi, caunê ke ez wazon i cau de bıwani.” Serra 1980 de piyê mı sebeta kari ama Avusturya. Khalık u pirıke, ma u pi, phonc domani. Domani pêro şiyêne mekteb. Jü teyna pi guriyêne. Piyê mı qayt kerd nia nêbeno, endi İstamol de ki idare kerdene gına çetıniye, şi “qurbeta qurbetiye”.

 

12 Paijia Verêne 1980 de na rae eskeriye veciye raa mı ser. Mı ‘Yatıli’ kerdi bi xo vira ke, na rae ki kewto hepısxane. Xona 19 serra xo de biyo! Phonc serrê gêncênia mı wertê çar dêsu de mendi. Hepısxane de karê nuştene de ez reyna çerexiyo sıiro. Çıke sıiri kılmek biy, xêlê ca nêguretêne. Sıiro wedardene tenêna rehet bi. U waxt de halê hepısxanu zaf zaf çetın bi. Gegane qeleme be kağıte bile tomete biye. Vatêne, “qoğışo sae keme”. Kewtêne zerre, çı ke di

 Guretêne, berdêne. İ sıirê ke mı hepısxane de nuşt, pêru nê, hama xêlê teni wertê mektubo de rusnay teber. İ mektubê ke mı hepısxane ra rusnê, maa mı i pêru dê are, qe jükeke vindi nêkerde. Hama hama 50 teni mektubi, ez ke veciyo teber, day bi mı dest. İ mektubi, i sıirê ke zerrê i mektubo de mı nuştê, xona mı derê.

 

Hatam nıka mı hirê kıtabê sıiro veti. İ sıirê ke mı hepısxane de nuşti bi, qe jükeke ni kıtabu de çina. Çıke sıirê hewli niyê, karê waxtê acemiyênia (xeşimênia) mınê. Caê inu ki çımanê mı de cao gıranu, hama sebeta sairêni ya ki hunerê sıiro nê! İ, qıraiş u zibatênia wertê çar dêsunê. Xonde ke ez weso, i ki şêrê heni jü kaleke de vınderê.

 

Ez ke hepısxane ra veciyo, çımê mı universta wendene de bi. Hama eskeriye universta ra, universta ki eskeriye ra kağıte waştêne. Jü waxt, arê eskeriye be universta de biyo guvıke. Mı qayt kerd ke nu kar nia nêbeno; ne şiyo eskerêni, ne ki şiyo universta. Bê universta ki ez şikiyêne bıbi qezeteci! Hama hama dı serri ra dıma, şiyo İstamol-Cağaloğlu de sıftê qezeteciyêni kerd. Paijia Wertêna 1986i de mı hesna ke jü perloda (mecmua) newiye vecina. Namê xo “2000’ne Doğru” (Vera 2000) bi. Hefte de reyê veciyêne. Şiyo, xo da nas kerdene. Wertê dı asmu de kewto kar. Asme de 45 lira dêne mı. Ez endi her hefte, jü xebere dıma feteliyêne. Qezeteciyêni de xona jü serra mı pırr nêbi bi, kıtabê mın’o verênı ki veciya. Nu kıtabo verên jü roman bi. (Namê xo: “Ayrımı Bol Bir Yoldu Metris”.)

 

Arê 1986-1998i de mı İstamol de qezeteciyêni kerde. Xêlê qezeto de, perlodo de, radono de guriyo (Perlodi: 2000’ne Doğru, Nokta, Aktüel, Tempo, Akis, Yön, Yeni Demokrasi, Komün, Roj, Jiyana Nû... Qezetey: Gündem, Cumhuriyet, demê Aziz Nesini de Aydınlık, Yeni Politika, Demokrasi, Yeni Ufuk... Radoni: Umut FM, Kent FM, Yön FM...) Nu are de morê kıtabunê mı bi bi phonc. Hirê romani, jü kıtabê sıiru, dı kıtabê cıgeyraişi (araştırma). Karo ke aqıl u goyılê mı de bi, mı u kar kerdêne, hama pêru ebe Tırki. Zonê ma xona tomete bi.

 

www.huseyin-simsek.com

huseyin.simsek@gmx.at



No nuste 895 rêy ame wendene

FACEBOOK FIKIRNAYİŞ
FIKIRNAYİŞ

NUSTÊ NUSTOĞİYÊ BİNİ

XEBERÊ ZÊDÊRİ WENDİYAYÊ
NUSTOĞİ
FIKIRBİYAYÊ PÊÊNİ
FOTO GALERİ
  • Guelê Quling (Yüzenada) - Çolig (Bingol)
    Guelê Quling (Yüzenada) - Çolig (Bingol)
  • Zımıstanê Welati
    Zımıstanê Welati
  • Çımê Muzıri
    Çımê Muzıri
  • Koê Welatê Ma
    Koê Welatê Ma
  • Mezelê Ma
    Mezelê Ma
  • Bonê Domantênya Ma
    Bonê Domantênya Ma
  1. Guelê Quling (Yüzenada) - Çolig (Bingol)
  2. Zımıstanê Welati
  3. Çımê Muzıri
  4. Koê Welatê Ma
  5. Mezelê Ma
  6. Bonê Domantênya Ma
FOTO GALERİ
YUKARI