Bugun...


Hüseyin Şimşek


Facebookta Paylaş









Arê ‘Yatıli’ be İstamoli de çhınçolıke de!
Tarıx: 08-01-2017 20:54:00 Newebiyayiş : 08-01-2017 20:54:00


Paijia Verêna 1974i de mı ‘Yatıli’ de sıfte mektebê werti kerd. Ez, önlügo şiay ra xeleşiyo ra! Sınıfê ma, endi bi bi sınıfê xort u azebo. Xorto çeket, pantole, mintane kerdêne pay; qıravete gırê dêne, sapqa nêne ro xo sare. A sapqa mektebi, karo de çetın biye. Zerre de vetêne, teber de nêne ro xo ser. Serra bine sapqa wertê ra vete, ma cı ra xeleşiyayme ra.

 

 

A serre, Paijia Verêne de mı sıftê mektebê werti kerd, hama hama jü asme dıma, Paijia Wertêne de çê ma dewe ra bar kerd, şi İstamol. Mal u dawari, maine, vas u sımeri, genım, ardi, cıti, musoni, çatani, sepeti, zıği, arabê gao, qılağa tezeko, thepıki... Çı ke pere keno, İstamol de lozım nêbeno, pêro roti bi. Hêgay, çairi, boni yê ma nêbi, xora. Wayirê nino, Tırkê dewa Komsori bi. Ma, arajiya ino ramıtêne, qori kerdêne, çinıtêne.

 

 

Çê ma bar kerd, şi İstamol, hama ez tey nêgureto. A khamyona ke çiyê çê ma bar kerd bi, ebe ae amay, ‘Yatıli’ de ez diyo, ez uca ca verdo, kewti bi raa İstamoli. Hesabê apê mı nia bi: ‘Yatıli’ de he rçi bêpero, sodır be son her waxt zerrê mektebi derê, nu laik itha rınd waneno. Mektebê werti ke qedêna, heni bêro İstamol. Pilanê ma pêru jü qese de bi, qesê xo kerdi bi jü: “Bıwanerê ke xo bıxelesnerê!” ‘Yatıli’ de wendene ra qeyr qe thawa çinê bi. Tersê ino u bi ke, “nu laik ke ama İstamol, kuyno/gıneno ra çiyanê bino dıma, wendene ca verdano”!

 

 

U waxt, kam fıkrê domanu pers kerdêne! Ez, a khamyonê dıma zaf berbo, hama mınê pızeji dest ra çı amêne ke! Eke amnon amêne, ez şiyêne İstamol; mektebi ke bi ra, tepia şiyêne Têrcan. Mı hatam ke serra 1977i de mektebê werti qedêna! O ra dıma ezı k’ biyo şarê İstamoli. Çê ma Tuzla de bi. Mektebê mın’o newe, ‘Tuzla Lisesi’ bi.

 

İstamol, suka/bazaro de gırs u sıxlet bi. Hengamê xo zaf bi. Ezı k’, jê i domananê dewıconê bino, jü het ra gınay bi wertê hengamu, qiru, zelzelu. Her jü het ra, her jü qafıke ra jü veng veciyêne! Pil u qıci, cêni u cüamêrdi, her kes kewti bi yerğatê jü siyaseti! Karkerêni, memuri, telebi... Pêru wışti bi ra lıngu ser. Tırki, Kurdi (Khurri), Lazi, Çerkezi, Kırmanci, Asıqi, Hermeni; Sunni, Elewi, Xırıstiyani, bêdini... Ya kewti bi çêrangê hetê ‘Raşt’i ya ki hetê ‘Çhep’i! Her jü waştêne ke mı boncerê hetê xo. Ma ‘Yatıli’ de wertê sukuti de -gorê na qire - qira İstamoli- bime. U qalıbo ke ‘Yatıli’ de ma kerdi bi cı, u qalıb, İstamol de bi parçe – purçık, şi!

 

 

Mı qayt kerd ke meylê siyasetê ‘Çhep’o de jü dina newiye, jü dem u dewrano newe esto. Eke a roce amê; esl u cısn, zon u kultur, iqrar u imanê ma rê ki tomete nêmanena! Ez, gıran gıran kewto bınê çêrangê jü partiya ‘çhep’o. Ma endi nia vatêne: Teyna, jü be jü xeleşiyaene çina! Pêru pia xeleşime ra!.. Nu hal, ma jü het ra zonanê pêrüno rê serbestiyêni waştêne, heto bin ra ki zonê xo bıne ra kerdêne xo vira. İstamol de çê ma de, teyna pirık u khalıkê mı zonê ma qesey kerdêne. Zonê ma weşiya ma gêncu ra kuli veciya, şi. Wertê serranê 1977-2005i de endi zonê ma qe niame zonê mı ver. Xonde ke gegane mı pilo ra hesnêne; fam kerdêne, hama neşkiyêne qesey bıkeri.

 

 

Ebe nu hal, çemberê zonê xo xo vira kerdene bi bi qapan. Xona ke dewe de wendêne, jü zono bin, zonê dewlete, Tırki ma rê bi bi meyman. ‘Yatıli’ de Tırki meymanêni ra veciyay bi, bi bi sermiyanê qeseykerdene be wendena ma. Zonê ma gınay be hetê pey, kewti bi jü qule, xo dardi bi we. Serra ke amo İstamol, endi qe tepia nêşiyo Têrcan, zonê ma weşiya mı ra koke ra veciya, şi, bi vindi. Nêmerd, hama bi vindi. Çıke bi vindi, ison şikino i arêkero, bıvino.

 

 

Sıkır ke zonê ma nêmerd, arê vişt-hirıs serru de bi vindi, hama des u phonc serri ra nato amo vinıtene! Ma nu qal ser tersê xo sıkıt endi: Çı ke biyo vindi, vineme uncia!    

 

 

www.huseyin-simsek.com

huseyin.simsek@gmx.at



No nuste 1070 rêy ame wendene

FACEBOOK FIKIRNAYİŞ
FIKIRNAYİŞ

NUSTÊ NUSTOĞİYÊ BİNİ

XEBERÊ ZÊDÊRİ WENDİYAYÊ
NUSTOĞİ
FIKIRBİYAYÊ PÊÊNİ
FOTO GALERİ
  • Guelê Quling (Yüzenada) - Çolig (Bingol)
    Guelê Quling (Yüzenada) - Çolig (Bingol)
  • Zımıstanê Welati
    Zımıstanê Welati
  • Çımê Muzıri
    Çımê Muzıri
  • Koê Welatê Ma
    Koê Welatê Ma
  • Mezelê Ma
    Mezelê Ma
  • Bonê Domantênya Ma
    Bonê Domantênya Ma
  1. Guelê Quling (Yüzenada) - Çolig (Bingol)
  2. Zımıstanê Welati
  3. Çımê Muzıri
  4. Koê Welatê Ma
  5. Mezelê Ma
  6. Bonê Domantênya Ma
FOTO GALERİ
YUKARI