Bugun...


Gula Mamekiye


Facebookta Paylaş









Dêsım de têfiştena cematê Güleni sero
Tarıx: 07-09-2016 00:01:00 Newebiyayiş : 07-09-2016 00:38:00


Manisa de jü başsavci jü qese kerd; Sarê Dêsımi zofi pörüne sanke madalya kerda vera, heni benê sa ke, qe pers mekerê! Mesela ke goynıtena, ma sarê Dêsımi ra rınd isu‘ çino! Mırdia mırd ho ve ho goyneme. Goynıtene (goynaene) vo; da, kami vato, ça vato, muhım niyo.

 

Nıka, ez ça serê na goynıtaişi de vıneto, zonê?

Na goynıtene jü nıka nê, her waxt hetê dewlete ra ma rê ‚ilerici, laik‘ (sıma ey Kemalist bıwanê) mırdia mırd ho danê vay daene, ji moreka khewiye kenê ma vera. Heni kenê ma vera ke, taê ma berdime, vetime serê berjênê ho!

 

Dêsım de şêrê çêu, caê itıqatu, hurındia Sey Rızay de Mısto Kor, hurındia pi u khalıkunê ma de Arabê Şii 12 imamu finê dêsu ra. Vanê, „asıl xas Mısılman mayme“. Şêrê pöre mezelu ra bıfeteliyê, zofi pörüne ra ‚ruhuna fatiha‘ nusnıtaiyo. Hona ki nusnenê. Kesi çino, ala pers kero, “Sıma ra çond mordemi fatiha zonenê, wanenê?!..” Zerrê Mamekiye de bıfeteliyê, hasa sıma ra, isu‘ ke qına ho ke bıçarno, gınena bar u birexane. Verê mektevu de eve destê polêsunê sivilu esrar pêskarê domonunê ma kerdo. Domonê ma‘ê gênci destê na ağuy de permelinê ra, sonê! Jü de ke eve zonê ho vame; 

„Ma ve xêr! Se kena, wesa, rında?“ İ heni Tırki kenê ke, to ail - mail manena. Ya, cigêrune mı pöre (pêro) derdiê!..

 

Nıka vanê, “ma Xızır vo, Duzgın vo, Fetullah Güleni dest ma ra nêno!” Piyê mı viyêne, qeso de rınd vatêne, serva na dest panaene. Ma, neyse; sıma xêrê ho panê...

Waxtê, gêncunê devrimciyu vatêne, “domonunê ho merusnê yurdu (YİBO). Na yurdu de domonu rê ejiyat u heqaret puredais jü het, domonu vurnenê, kenê thonê Sunniyo. Eve domonunê ma Qurane danê wendene, nemaz kenê. Domonunê ma az - uzê ho ra, kultırê ho ra kenê ğeriv, kenê dısmen.”

 

Nafa ke YİBO bas kerd, eve destê dewlete Özel Koleji kerdê têra. Ez ve ho saado; pêra moa mı ra jü çêna ho rusnêne Munzur Koleji (na mektev eve destê Fetullah Güleni ame rakerdene). Ma eve satu tey qesey kerd. 

 

Ma va ke, “çêna ho eve destê ho adır meerze. Destê sıma ra ke vejiye, danê sarê ho re, ax - wax kenê, o waxt is is ra vêreno ra. Sıma eve ho vanê, verdanê etüto, düau danê wendene. Verê domonu de jê bekçi ver de tik benê, eve vatena dinu ra ‘abla ve abileri’ verê domonu ra nevejinê.”

Aver eve vengê pöredaişi,

“Nıka çıko, sıma lınge esta na domonunê ma ver, nêverdanê bıwanê! Devrimci vê, şêrê ko?!“

 

Hela neyse, ma kerd, inu kerd, ma bas vejiyayme, ma ardi qesê ho ser. Çênê ho o mektev ra dê guretene. Hora i serru sarê zerrê Mamekiye zofi pörüne domonê ho rusnêne na mektevu. Taê ma ra iso ke eve destê ho na mektevu rê rayberine kerdêne, goynıtêne, vatene, „Tekê ho çino. Kam ke na mektevu de da wendis, thol nêmaneno, beno mordemo muhimo hewl.“

 

 

Taê domonê devrimciyu serva na mektevunê F.Gülen çê ve çe feteliyay, va ke, „domonunê ho na mektevu mederê! Na mektev domonunê sıma rê xêr niyo, bêxêro, xıravina de gırsa. Domonunê ho rê na dısmenine eve destê ho mekerê!“

 

O ri ra nia dê ke serê mıleti de xatırê domonunê devrimciyo vêreno, dewleta Tırko verê domonunê devrimciyo sola bıbırno va ke, ‘haqa sıma de ixbar esto’. Domonê devrimciyo bêxeta bêguna pê gureti, eşti zarre. Na mesela de domonê devrimciyê ke emegê ho, haqa ho vêrda, bêxeta u bêguna dewleta Tırko 12 -15 serri day cı.

 

Çı beno, bıvo; kam sa vano, vajiro. Na bela u derdo ma ve ho, ho rê pêda keme. Eve destê ho rêçe salıx dame. Ma reyê ‘kilıtê kou kerd vindi’. 10 hazaru ra zofi isonê ma bêkefen şi! Jê kıla çhiki eve hazaru isu’ her jü, jü na re caê.. Reyna vindikerdene az - uzê ma rê merdena. Az - uzê ho rê na dısmenine rayberine mekeme!

Serva na meselu ke apê mı qesey kerdêne, jü qesê ho bi. Vatêne, „Ma feqir bime, hama wayirê anori bime. Key ke tenê perey kuti ma dest, anorê ma ki destê ma ra perra, şi!..

 

Bımanê roê Kırmanciye de!



No nuste 1847 rêy ame wendene

FACEBOOK FIKIRNAYİŞ
FIKIRNAYİŞ

NUSTÊ NUSTOĞİYÊ BİNİ

XEBERÊ ZÊDÊRİ WENDİYAYÊ
NUSTOĞİ
FIKIRBİYAYÊ PÊÊNİ
FOTO GALERİ
  • Guelê Quling (Yüzenada) - Çolig (Bingol)
    Guelê Quling (Yüzenada) - Çolig (Bingol)
  • Zımıstanê Welati
    Zımıstanê Welati
  • Çımê Muzıri
    Çımê Muzıri
  • Koê Welatê Ma
    Koê Welatê Ma
  • Mezelê Ma
    Mezelê Ma
  • Bonê Domantênya Ma
    Bonê Domantênya Ma
  1. Guelê Quling (Yüzenada) - Çolig (Bingol)
  2. Zımıstanê Welati
  3. Çımê Muzıri
  4. Koê Welatê Ma
  5. Mezelê Ma
  6. Bonê Domantênya Ma
FOTO GALERİ
YUKARI