Bugun...


Çêverê Asmêni


Facebookta Paylaş









Tiyatro sero kılmek ra
Tarıx: 17-04-2017 14:53:00 Newebiyayiş : 17-04-2017 14:58:00


Pelga newiye newe nêmanena, sati peyser ser nêgureyenê. Serva raa dıyine reyna sans ma nêdino. Hama tiyatro de key ke wazena, texto şia kena pak, newe nusnena (Peter Brook).

 

Dewlete de serva talim u terviya isonu, meferê tiyatroy zaf jêdero. Tiyatro jê barometrey avêşiyaena dewlete pêmeno. Tiyatro heserbiyaena mıleti werte dı-hirê serri de zaf avê beno. Hama eke perr - paê tiyatroy biye jê nenıkê qatıre, o tiyatro qe thawaê rê ki nêbeno, mıleti keno xav, keno sıst, keno pirıke, verdano ra.

 

Mıleto ke dest era tiyatro xo nêerzeno (yardım nêkeno), ya merdo, ya ki kertê kerkelê merdene dero. Tiyatroo ke hesarê derdê mıletê xo nêbiyo, avê ra nat gos ke vengê pakotena zerria mıletê xo ser nêno, ya eve huyais zerre u pize ra kerdene, ya ki eve bervais têla roê mıletê xo nêgıno, rengê mıletê xo dos nêkerdo, xo ra mevazo ‘ez tiyatroune.’ O tiyatroo henên serva sovkerdena, eve qırais u hirais waxt kistena (Ferederico Garcia Lorca).

 

Tiyatro karê ro qolay niyo. Karê jü teni ki niyo, karê komelo. Tiyatro de resım esto, muzik esto, reqıs esto, hunermendêni esta, edebiyat esto, senata rındekiye esta, tiyatro de nustoği estê, sahna esta, dekor esto, tarix esto. Esto, esto, esto. Jüyo ke vano, ‘ez na kar ken’, xo rınd wedaro, rono.

 

Bêrime komela ma’wa tiyatroy’a newiye “Çêverê Asmêni”. Ma serva zonê xo, kulturê xo kotime ra rae. Ma pêro ki zoneme ke, zonê ma, raa ma, kulturê ma amo şindorê vindibiyaene. Ma ke domonê na hardime, ma ke na zon de bime pil, ma dêndarê na kulturime. Kam ke desteber çı ke yeno, gereke peyser medero.

 

İson ke nia fıkıriya, zerrê isoni zan dano, isu’ kuno ra kulturê xo ver, kuno ra zonê xo ver, vano, ‘mı dest’a çı yeno, kherru?’ İyê mın’ê mı, raa mı şiye tiyatroy de vejiye. Ez kaykerdoğê tiyatroy nine. Mı Tırki de ki talim u terviya tiyatroy nêdiya. Mı sıfte zonê ma de tiyatro komela Arêyê Kay de kay kerd. Nıka ki ma komela Çêverê Asmêni de kay keme.

 

Zonê ma de nêşkime kaykerdoğu bıvênime. Olvozê ke yenê ki, asmê, dı asmi’a dıme eke çetıniye diye, texelinê, ninê. Olvoji serva idarê xo gereke caê karê teveri de bıgureyê. Waxtê huyo ke tholo, vajime peyê hefti teyna şikinê ke bêrê, prova bıjêrime. Eke heni ke bi, karê tiyatroy avê nêsono. Nêşkina şêrê turne, nêşkina jêde kar arêderê.

 

Na kar gereke eve esq bıbo. Jüyo ke eseqiyo tiyatro, reyê ke tira tiyatroy zerria dey de kar kerdo, tı ke ey resenun’a gırê dê ki, o oncia ki tiyatroy ra vaz nêbeno. Çımê xo ne pere de, ne pul de bo gereke, era şan u şoreti dıme mekuyo gereke, xo sas mekero, raa xo ca meverdo, weşiya xo heni bıramo.

 

Tiyatro de kaykerdoği ro danê karakteru. Sahna sero, bedenê dinu ra newe ro yeno dina. Tiyatro de hazar tene jü rae de, zerrê jü hewni de yenê têlewe. Sonê a dina, yenê na dina. Kaykerdoği ve şêrkerdoğun’a benê jü lese. Kaykerdoğ ke huyiya, şêrkerdoği huyino; kaykerdoğ ke berva, şêrkerdoği ki berveno. Na kırameta nianêne serê hardi de kami de esta, ezı ki nêzonen. Tiyatro makina berğel zamania. Eke wast, hazar serre peyser sona; eke wast, hazar serre avê sona.

 

Mıleto ke bêtiyatro mendo, hetê hu’yê ro jü nêmezeto.
Rındekênia tiyatroy de bımanê.

 

Veli Kişioğlu

 



No nuste 396 rêy ame wendene

FACEBOOK FIKIRNAYİŞ
FIKIRNAYİŞ

NUSTÊ NUSTOĞİYÊ BİNİ

XEBERÊ ZÊDÊRİ WENDİYAYÊ
NUSTOĞİ
FIKIRBİYAYÊ PÊÊNİ
FOTO GALERİ
  • Guelê Quling (Yüzenada) - Çolig (Bingol)
    Guelê Quling (Yüzenada) - Çolig (Bingol)
  • Zımıstanê Welati
    Zımıstanê Welati
  • Çımê Muzıri
    Çımê Muzıri
  • Koê Welatê Ma
    Koê Welatê Ma
  • Mezelê Ma
    Mezelê Ma
  • Bonê Domantênya Ma
    Bonê Domantênya Ma
  1. Guelê Quling (Yüzenada) - Çolig (Bingol)
  2. Zımıstanê Welati
  3. Çımê Muzıri
  4. Koê Welatê Ma
  5. Mezelê Ma
  6. Bonê Domantênya Ma
FOTO GALERİ
YUKARI