Bugun...


Çêverê Asmêni


Facebookta Paylaş









Nata darbe, bota darbe...
Tarıx: 25-12-2016 01:08:00 Newebiyayiş : 25-12-2016 01:08:00


Sonde sate heşta, televizyonu de bi hayleme, va ke Tırkiya de darbe (tharve, darbe) bena. Tanq amo pırdê Boğaziçi ser. Mılet vost marketu, makarna gurete, va ke darbe bena, ma gest de mıreme. Hal - mezalê darba Tırkiya bi sanıka pir u kole. Cêrena vırêniye, peyniye xo vira kena; cêrena peyniye, vırêniye xo vira kena. Kami darbe kerda, kami se kerdo, thawa ma sare nêkut. Hata a roze ‘terör örgütü’yê ma honde ke PKK bi. Çımê ma ve roşti bê, PKK rê ‘bıra’ ame, name bıraê ‘terör örgütü’yo newe: Fetö.

 

Ma, sıma ve na Fetöy  ra bıray nêbiy? Hata nıka sıma ve Fetö pia we nêerjiyêne? Sıma jü qav de puşêndia jüvini nêwerdêne? Nıka se bi? Sıma sonde kuti ra, sodır jüvini de biy dısmen. Ma; ma çı zona ke dısmenê, ma pıstınê xo de mor fetelno? Ma sarê mori erzeme bınê lıngunê xo. Pelexneme ra. “Heqo, ma ef ke, guna ma ravêro!” Cematê xo ve xo kenê. Hem savciyê hem hakimê.

 

Nıka na hukmat thawa perre xo ser nênano. Tırkiya de roz 100 mordem mıreno, her ca de bombey peqenê, honde cênci mırenê, ‘büyük elçi’yo Hurus kişt. Hukmati’a qe veng nêvejino. Dı eskerê Tırkiya Işidi eve adır vêsnay. Hukmati’a veng nêvejino. Na bela kami arde, pılosnê na dewlete ro? Na politika kamıji hukmatia? 15 serrio kamıji partiye na dewlete de hukmata?

 

Honde ke vejinê televizyon, herresa’ kenê, colanu danê, sanıka 40 serre qesey kenê: “Dewleta Tırkiya de kes bas nêkeno. Ma terör qedêneme, kokê inu ame, bınê warê inu erzeme ra ser.”

Çewres serra ra ke ayni leq-loqo, ayni qoq-qoqo. O sono, o yeno, qese ayni qeseo.

 

Va ke, “Tırkiya de darve bena, demokrasi ma dest vejino. Esker ke ame idare, dewlete gurete xo dest, kokê sıma ano. Partiyu qapa keno, siyasetçiyu erzeno zerre, qezetu qapa keno, qezeteciyu erzeno zerre, meclıs cêno xo dest, vengê wekilunê mıleti bırrneno. Bê sorği, bê sual eve ilava, eve iftıra mıleti erzeno zere. Mekemey kunê bıne bandıra eskeri. Çutır ke wast, heni qerar danê ra cı.”

 

Hata son têlevizyonê hukmati de “15 Temmuz Şehidleri Tiyatrosu” kay keno. Figuranê cênci vejinê, “ma bime sehid, ma bime qaji.” Namê pırdê Boğaziçi’yo 45 serre, sodır uştime ra ke, kerdo “15 Temmuz Şehidleri Köprüsü”.

 

Roza ke mılet nêmıreno, roza ke esker nêmıreno, roza ke Pkkyıji nêmırenê, a roze çina. Hata su’ Tırkiya de goni sona. “Başbaqan ve cumhurbaşqani” ra vejinê têlevizyon. Vanê, “zerre u xatırê mıletê ma. Domonê ma serva welatê ma biyê şehidi. Endi şehidên’a dot mertebe çino. Xoji ve inu bo ke, ê biyê sehidi. Keşkêna ma rê ki Heq a roze naşiv kero. Ma ki serva na welati sehid bime.”

Heq din u peyxamber kerdê pêskıra destê xo, hata su’ pê goni’a, destunê xo kene pak.
 

Awa ke ma nêdiye, ma nêhesne, ma Tırkiya de diye. Şırnaq de cendegê (meytê) cênıke 7 roji tijia amnoni vera mend. Mılet cınazê xo kerdi ‘derin donduruci’, nêverda ke mılet meytunê xo ki wedaro. No senê zulumo? Rınd ke dinê sıma pêrüne ki İslamo! Ma de vanê, “dısmen çıxaşi ke dısmeno, eke xısmê xo kişt, cêreno ra ver, çarneno.”

 

Nıka reyê fekê ma u piyê na eskeru we nêbeno. Na honde cêncê ma çınay vera mıreno? Ma na domonu keme pil ke, hukmat bero, qedaê xo fek’a no. Maunê eskeri vezenê ro têlevizyon, yenê tavuta domonunê xo ser, vanê “welat wes bo. Eke jüna ke lazê mı bıbo, ey ki rusnen esker, isala o ki beno sehid.”

Nıka, tı senê moa, tı zerre ra kemera, çutır merdena domonunê xo wazena? Sıma çutıri bınê guna na cênc u rowalun’a vejinê?

 

Işid (Dewleta İslami Iraq u Şam de) Suriya de 16 eskerê Tırkiya kişti. 2 eskeri verê çımunê dina de vêsnay. Keşi ra pızınê nêvejina. Davutoğli serva Işidçiyu vatêne “thawa çino, daasê cêncê, kotê ra hêrsê xo ver.”

Ê domonê sıma jêde hêrs biyê, sıma Tırkiya de kerdi meyma’, eve TIRu cı rê cepxane rusna, sıma xestexanunê Tırkiya de dırvetıni kerdi weşi. Sıma pere da cı, sıma lojistik phoşti dê ve cı. Ê şerefsıji uşti ra, eskerê sıma vêsnay. Kutık bile cao ke lhop weno, uzay rê xainêni nêkeno. Ninu viyarno kutıkun’a ki.

 

Na mıliyetçiyê Tırkiya kotiê, nêvanê “Vatan, Millet, Sakarya”? Qe ninu de gonia Tırki çina, zerrê ninu zerrê axuro? Dême ke hukmati ke çutır tüya kerd, çutır ver çarna, heni sonê. Hama eke ame mesela Kurdi, Zaza u Hermeni, mesela Rum u Yezıdi, mesela Elewi, jê garana kutıku kunê têare, lawenê, zurrenê. Mıleti kisenê, bonu, binau vêsnenê, talan kenê. İşçiyê (karêrê) ke Diyarbekır ra u Van’a amê, xorê insatu de gureyenê, sonê, inu kisenê. Tekbir anê, vanê “Allahu Ekber”. Işid xo ra bomba gırê dano, waxto ke bıpeqno, vano, “Allahu Ekber”. Başbaqan (serwejir) vejino, vano “Allahu Ekber”, reisê cumhuri vejino, vano, “Allahu Ekber.” Ülküciy vejinê, vanê, “Allahu ekber.” Kam ke namê Heqi dekerneno, qır keno, kiseno.

Heqe ma u sıma jü niyo, dême ke...

 

 



No nuste 777 rêy ame wendene

FACEBOOK FIKIRNAYİŞ
FIKIRNAYİŞ

NUSTÊ NUSTOĞİYÊ BİNİ

XEBERÊ ZÊDÊRİ WENDİYAYÊ
NUSTOĞİ
FIKIRBİYAYÊ PÊÊNİ
FOTO GALERİ
  • Guelê Quling (Yüzenada) - Çolig (Bingol)
    Guelê Quling (Yüzenada) - Çolig (Bingol)
  • Zımıstanê Welati
    Zımıstanê Welati
  • Çımê Muzıri
    Çımê Muzıri
  • Koê Welatê Ma
    Koê Welatê Ma
  • Mezelê Ma
    Mezelê Ma
  • Bonê Domantênya Ma
    Bonê Domantênya Ma
  1. Guelê Quling (Yüzenada) - Çolig (Bingol)
  2. Zımıstanê Welati
  3. Çımê Muzıri
  4. Koê Welatê Ma
  5. Mezelê Ma
  6. Bonê Domantênya Ma
FOTO GALERİ
YUKARI