Bugun...


Berfin Jêle


Facebookta Paylaş









Niyajni Kata Sona?
Tarıx: 04-02-2017 23:42:00 Newebiyayiş : 05-02-2017 00:12:00


Waxtê de caê guçıkê Estemoli de xorê dı kokımunê feqıru jü çımê boni u ver de ki tenê thapelê baxçe, tey weşiya xo ramıta, şiyê. Ni hurdımêna ki Estemol ra niyê, feqet na suke ra zaf has kerdo, cêncêni u kokımênia xo uza de viyarna ra. Suka Estomoli mevazê, meşêrê. Renga reng u tarix ra xemeliyaiya. Çond pasay u xanedani amê u vêrdê ra, şiyê. Naine ra pia çond saray u qonaği vırajiyê u oncia rıjiyê. Oncia ki wertê dengıji de xoser, jê jü çêneka de nazluye vana ‚ezune‘, zobina çi nêvana. Suka de khewiya, suka de rındeka.

 

Omnonê Estemoli ra jü roza, roza de rındeka. Asmên pakao, ca be ca hewrê şisıki biyê ra derg, sewlê tiji gıno be dengıji sero, nêmê Estomoli jê ayney tey oseno. Boa dengıji ra vao de honık pıloşiyo ro dormu, inson qailo ke bınê şiya daru de roniso u raoroşiyo.

 

Kokımê ma ki honıkiya baxçey de na roza rındeke ra bara xo cênê, xorê pia gıra‘ gıra‘ ara xo kenê. Xeylê waxt ke vêreno ra, niyajniye urzena ra, şiniya ara cêna, sona dunıke, qavu-mavu şüna, tenê ki çê kena pak. Mêrdê cênıke nêwes beno, ara ra dıma hewn niseno ro ser, meqeto ke teverao, sero merredino ra, heni pa sono. Cêniya kokımi eve xo Azeriya, niyajniye reyê hetê mêrdê xo ser nia dana ke çı bıvino: Mêrde hao meqeti sero ramerdiyaeo, orğan ki çip onto xo ser, fek rakerde heni pa şiyo, xırre-xırra xuya. Niyajniye dı-hirê rey gılê uşire gıra‘ kuna de cı, vengê xo kena berz, leq kena, vana;

 

- La-laooo... o çıko, tı na germê peroji de orğan çip onto xo ser? Ero, arqi ver feteqina. Çê nêrıjiyae; mebo, mebo ke serva huriyunê ceneti tı rew saqu tik kerê, mı tek u teyna alange de bıverdê. Ero, pê to xapnenê, a qesa kami ke veta, pêro zuro.

 

Niajniye nia dana ke mêrdey ra phıjiyê nêvejina, hewno xori dero, endi qarsê cı nêbena. A ki canbêzariye ver çentê xo cêna, xo erzena tever, terknena, sona. Cao ke mılet niseno ro tomofili, yena uza, tomofil ke ame, nisena ro cı. Tenê ke şi, şofori ra vana;

 

- Ha oğıl, bilirsen, hindik mavi minibüsin yanında düşecem. (nê lazê mı, zonena, nıka leyê tomofilê khewey de gınenune waro)

 

İyê ke zerrê tomofili derê, taê jübini de nia danê huyinê, xo xo de vanê; ‘xorê kokıma, sa u so ra qesey kena.’ Taê ki zerria xo cı rê vêsena. Keşi ra veng u vaz ke nêvejino, niyajniye nafa ki qirrena, vana;

- Oğıl, Oğıııııl, beni hindik işitmirsen ha; mavi minibüsün horda düşecem. (Lazê mı, lazê mı, nıka mı nêhesnena, nê; leyê tomofilê khewey de gınenune waro.) Mılet na rae vatena niyajniye qif cêno, yenê, pê deşti cênê, vanê;

- Niyajni, kotiê to dezeno, ça gınena waro? Tı nêwesa çıko? Toxtori rê têl rakerime, bêro. Niyajniye nia dana ke ni ae fam nêkenê, fıro peyêno ke teyro, eve dey sona ra sofori ser, uşira ke dest dera, heznena, vana;

- Hindik mavi minibüsün yanında düşecemmm. (Nıka leyê tomofilê khewey de gınenune waro)

Uza ra jü xıl beno, vano;

- Niyajniye wazena ke bêro war, Azeriki de manê xo “düşecem” ‘yenune war.’ Sofor, vano;

- Ya Haqu tala, no çık bi, ame sarê mı ser? Niyajni, niyajni; sabrê mı teng meke, tomofilo khewe jê ma sono, ez çıturi to ronine? Haq bo, eke vınet, to nan ro, jêde ma meqefelne, tenge meke.

 

Tomofilo khewe vındeno, mılet pê destê niyajniye cêno, ano war. Yi heni zonenê ke jü naskerdoğê niyajniye tomofilê khewey dero, coka vana, mı lewê dey de ronê. Nia danê ke niyajniye vêrena ro dine sona, hetê ra ki soferi ra heni mılqiyu kena ke hêvetu ra ferq de niya, cade de serva peyau lamba sure vêsena.

 

Niyajniye her ke game este, taê tomofili korna cınenê, taê fıren kenê, taê kunê jübini ra, cade beno têwerte ra. Tomofilê polosu kuno ra niyajniye dıma, anons de, vanê:

- Niyajni, kata sonaaa, niyajni kata sonaaaa? Niyajniye vana:

- Damao tezelo! Ero murdarê dêşi, sıma rê çı ke, xorê son çê bıraê xo, xevera mêrde mı esta, ‘ro!

 

 

4-2-2017

 

 



No nuste 323 rêy ame wendene

FACEBOOK FIKIRNAYİŞ
FIKIRNAYİŞ

NUSTÊ NUSTOĞİYÊ BİNİ

XEBERÊ ZÊDÊRİ WENDİYAYÊ
NUSTOĞİ
FIKIRBİYAYÊ PÊÊNİ
FOTO GALERİ
  • Guelê Quling (Yüzenada) - Çolig (Bingol)
    Guelê Quling (Yüzenada) - Çolig (Bingol)
  • Zımıstanê Welati
    Zımıstanê Welati
  • Çımê Muzıri
    Çımê Muzıri
  • Koê Welatê Ma
    Koê Welatê Ma
  • Mezelê Ma
    Mezelê Ma
  • Bonê Domantênya Ma
    Bonê Domantênya Ma
  1. Guelê Quling (Yüzenada) - Çolig (Bingol)
  2. Zımıstanê Welati
  3. Çımê Muzıri
  4. Koê Welatê Ma
  5. Mezelê Ma
  6. Bonê Domantênya Ma
FOTO GALERİ
YUKARI