Bugun...


Ali Dikme


Facebookta Paylaş









Xızırê ma
Tarıx: 13-02-2017 22:51:00 Newebiyayiş : 13-02-2017 22:52:00


Xızırê ma niseno ro astorê qırri, gılê kou ra tozıke vay dano, sono, feqir u fıqaru xelesneno. Rew beno, herey beno, jü Heq zoneno.

 

Dewro vırên de mordemê ro kokım be cênıka xo ra benê. Rozun‘a rozê Xızıri beno. Sonde lêl kuno, xorê tenê şir pozenê, wenê. Cau kenê ra, kunê ra.

 

Beno sodır, kokım urzeno ra. Verê çêveri ra vore erzeno, keno pak. Kokıme veng’a cı dana, vana, “Bê, ara xo bıke!” Kokım çarxunê xo ra vore rêç keno. Çarxunê xo erzeno dari ser, sono zerre. O be kokıme ra nisenê ro, nun – thoraq, piyaz honıke sero no ro ke ara xo bıkerê. Xafılde kokıme vana,

“Nê kokım, çarxê to kuyê?” Vano,

“Mı tevera eşti ra darê ser ke tenê bıonciyê.“ Kokıme vana,

“Ax, dele çarxi berdi!“

 

Urzenê ra, sonê tever ke, çarxo jü dele berdo, hao hêga de wena. Endi kor – posema’ yenê zerre, kokım vano,

„Ma, a ki vêsana; şêro, buro.” Uza ra nonê cêno, nano sova ra, keno germ, thoraq, piyaz keno zerrê gude, löwê xo de nano ro. Kokıme vana,

“Çae nêwena? To o kerd gude, löwê xo de na ro.” Vano,

“Kınkor xeleşiyo, son ko ra kınkor an. Nonê xo bure, tı ki mı rê a çêsane u resen ra bia.”

Nonê xo wenê, kokıme sona, çêsane be resen ra ana. Vana,

“Kokım, mı kerd xo vira, to rê qesey nêkerd: mı ewro hewnê di.” Vano,

“Xêr bo, ala qesey bıke.” Kokıme vana,

“Tı ewro Xızıri vênena. Rae ra raştê to beno, xo vira meke.”

 

Kokım o jü çarxê xo keno pay, lekanu cêno, gırê dano. Kuno ra rae. Xeylê sono, kuno verê koy, nia dano ke jü hao cor de yeno. Sılam dano kokımi, kokım sılam cêno ra. Vano,

“Tı kamıjiya, koti ra yena, sona koti?” Vano,

“Ezı k’ na dewun’au, amune xo rê loqmê heqiye dan arê.” Kokım vano,

“Xêr ama. So, dewe hazara.” Kokım sono, kınkor bar keno, niseno çêsane vera kas keno, ano çê. Kuno verê çêveri. Kokıme yena, tey resen kena ra. Vana,

“Tı mışêle biya, so tenê xo germ ke. Ez resen ken ra, peydo beme zerre.” Kokım sono zerre. Peydona kokıme ki sona zerre, vana,

“Qesê, xeverê, kokım?”

“Ma, çı qese, xevere bo; gılê koy ra kam esto? Şine, mı kınkor bar kerd, amune.“

 

 

Daesê roji ra tepia oncia kokıme vana,

“Mı hewn di; Xızır raştê to beno.” Kokım vano,

“Raa vırêne ki to va, ‘Xızır raştê to beno.’ Jüyo feqır raştê mı bi. Va ke, ‘son, xo rê loqme dan arê’.”

Kokım urzeno ra, sono ke velg biaro, rae ra jü raştê cı beno. Ma be xêr - xêr be sılamet. Kokım vano,

“Bıra, tı mı rê pêse asena; tı koti rawa?” Vano,

“Na dewun’au, xo rê loqme dan arê.” Kokım vano,

“Dewe hazara, so.”

 

Sono, velg ano verê çêveri. Kokıme oncia yena, vana,

“To Xızır di?” Vano,

“Cênık, oncia jüyo feqır raştê mi bi. Va ke, ‘son, xo rê loqme dan arê.’ Kokıme vana,

“Bomo, bomo; Xızır raştê to biyo, koto thonê feqıri. O Xızır biyo!”

Raa bine oncia kınkor xeleşino, sono, kuno peyê bonu. Kokıme veng, dana, vana,

“Haydar be, Xızır yeno!” Kokım destê xo erzeno we, vano,

“Sarê to de aqıl nêmendo. Vana, ‘Xızır’, jüna nêvana.”

 

Xeylê beno berz, nia dano ke jü hao yeno, her bar kerdo. Ortê vore de her ge gıneno waro, ge urzeno ra, yeno. Kokım nejdi beno ke jüyo Hermeniyo. Taê çi-mi no ro heri, vano, “ben, rosen.” Kokım vano,

“Ez zonen, tı Xızıra. Uwo ke tı kota thonê Hermeni, mı rê Xızırênia to lozım niya. Kata sona, so!”

 

Yeno çê, cênıke vana,

“Kokım, to Xızır di?” Vano,

“Xızırê to koto thonê Hermeni. Mı rê Xızıro henên lozım niyo.” Cênıke vana,

“Dı rey koto thonê feqıri, tı oncia cı rê wayir nêvejiya. Na aylim vato, ‘thonê Hermeni kune, ala se keno?’ ”

Kokım cêreno ra cı, vano,

“Cênık, Xızırê ma niseno ro astorê qırri, kıncê xo sıpeyê. Ey ke zengü da astorê xo ro, dıma tozıke vay dina. Nurê riyê xo esto. Herdisıno, buriyê xo qolındê. Tenga feqır u fıqari de reseno ma. Naê ke raştê mı biyê, pêro feqırê, ero dey nêşiyê. Çae dine ra vajine, Xızır?” Cênıke vana,

“Heya, mordemek: feqırêni u fıqarêni yê ma qulê heqia. O koto thonê feqır u Hermeni ke ala tı se kena. Ey tı cerrevna. To lew dest’a nêne, xo de haşt kerdêne. Xızırê ma tenga itıqatu pêrüne de sono, reseno.”



No nuste 734 rêy ame wendene

FACEBOOK FIKIRNAYİŞ
FIKIRNAYİŞ

NUSTÊ NUSTOĞİYÊ BİNİ

XEBERÊ ZÊDÊRİ WENDİYAYÊ
NUSTOĞİ
FIKIRBİYAYÊ PÊÊNİ
FOTO GALERİ
  • Guelê Quling (Yüzenada) - Çolig (Bingol)
    Guelê Quling (Yüzenada) - Çolig (Bingol)
  • Zımıstanê Welati
    Zımıstanê Welati
  • Çımê Muzıri
    Çımê Muzıri
  • Koê Welatê Ma
    Koê Welatê Ma
  • Mezelê Ma
    Mezelê Ma
  • Bonê Domantênya Ma
    Bonê Domantênya Ma
  1. Guelê Quling (Yüzenada) - Çolig (Bingol)
  2. Zımıstanê Welati
  3. Çımê Muzıri
  4. Koê Welatê Ma
  5. Mezelê Ma
  6. Bonê Domantênya Ma
FOTO GALERİ
YUKARI