Bugun...



Veli Kişioğlu: Serkê Xeçi
Tarıx: 24-04-2017 15:05:42 + -


Ewro 24ê Nisane, 102 serri ra aver fermanê Ermeniyan u ğeyri muslıman (Sıryaniy, Urumi, Yezıdi) vet, qırkerdoğan şarê Anadoliye u Mezopotamya'ê tewr kehani welatê xo ra qılaynay ra, rışti menfi (surgun) ya ki kışti ya ki xeylê tenan ki xo dard we (nımıt). Ma nê sucê insanetine anime a xo viri. Zazayan (Dımıli, Şarê Ma, Kırmancê Dêsımi) ki xeylê rayi qırkerdene diya, pê nê deci zanê. Na dewlete mewcudiyetê xo kışten u werdardena mıletanê nê erdi sero nao ro. Qeleme nıka nuskarê ma Weli dera.


Veli Kişioğlu: Serkê Xeçi

Serkê Xeçi

 

Waxtê tertelê Hermeni de, Hermeni ke qır kenê, Dêsım de, dewa Qısley (Nazımiya) Hakıs de Serkê Xeçi beno. Serk wayirê dı lazu beno. Lazê xo xort benê.
Fermanê Hermeni veto, Hermeni qır kenê. Serk zaf terseno, hewn mıze nêkuno, vano, ‘key yenê, ma benê, qır kenê?’

Rozê urzeno ra, sono Gomê Xormeçıku. Gomê Xormeçıku dewa Kuduna. Serk sono leyê Bava İsmailê Seydi. Cêvê xo ra laê xo vezeno, vano,

“Bava, ala na la de nia de, wayirê to serva ma se vano?” Bava İsmail la keno xo dest, vano,

“Serko, sıma peyniye de benê ağaê na dewe.” Serk huyino, vano,

“Bava, gonia xo to ra kerine, fermanê ma veto, ma qır kenê. Tı vana, ‘sıma benê ağaê na dewe’.” Bava İsmail vano,

“Mı ra ke çı ke asa, mı o va ke”
Serk lew nano Bava İsmaili dest’a, çıraliğê dey dano cı, beno rast, cêreno ra Hakıs.

Werte ra dı heftey vêreno ra, ra nêvêreno, Qısle ra 2 cendermey vejinê, yenê. Serk ve hurdımêna lazun’a finê ra xo ver, benê. Destunê Serki gırê danê, iyê domonu gırê nêdanê. Domoni jêde pil nêbenê, gumano ke.
 Tene rae ke sonê, Serk gıra’, eve zonê xo Hermenki, domonunê xo ra vano ke, ez verdin na cendermu, cendermu dan hard’o, sıma jü na heti ser, jü ki na heti ser bıremê, xo bıxelesnê. Ê sıma dıme nêverdanê, metersê.”

Serk verdino ro cendermu, cendermu dano waro, o ve cendermu ra hard de tenê gulase cênê, domoni jü hete çhepi ser, jü ki hetê raşti ser, jê thayru perrenê ra, sonê. Cendermey hard’a urzenê ra ke domoni çinê. Era domonu dıme nêkunê. Serki cênê, sonê Qısle.

Serki benê Qısle qereqol leyê qomutani. Qomutan Serki de nia dano, çımê xo gıneno ra thurıkê vılê Serki. Vano, “Uyo ke vılê to ra darde kerdo, o çıko?” Serk vano

“Qurana Kerima” Qomutan vano,

“Ma, tı bese kena wanena?” Serk vano,

“Heya, ez wanen.” Qomutan,

“Ma, veze, bıwane ala..”

Serk vezeno, waneno. Qomutan sas kuno cı, eskerun’a vano, “ney raverdê, şêro, no endi ma rao.”
 

Na mesela moa mı waxtê piyê xo ra mı rê qesey kerdi vi. Mı rê ke çutır qesey kerda, mı heni nusnê.

 

Veli Kişioğlu




Bınge: Veli Kişioğlu

Editör: Mesut Asmên Keskin

Na xebere 314 rêy amê wendene

Etiketi :

FACEBOOK FIKIRNAYİŞ
FIKIRNAYİŞ

QOM XEBERÊ BİNİ

YUKARI