Bugun...



Terorist Enis Emri Milano de kışiya
Tarıx: 23-12-2016 16:14:27 Newebiyayiş : 24-12-2016 04:19:27 + -


Enis Emriyo ke vanê ke Bazarê Berlini’ê Noeli de ey pê TIR ramıto insanan ser, 12 teni kışti, sûka İtalya Milano de hetê polisan ra yew kontrolo rutin de kışiya. Heqa Enis Emri de Ewropa de emrê cıgeyrayışi veti bi.


Terorist Enis Emri Milano de kışiya

Teroristo İslamisto Tunısıc Enis Emriyo 24 serre, sûka İtalya Milano de surey yew kontrolê rutini de ame kıştene. Wexto ke polisê İtalyani ewro şewe ra saete 3yıne de erebey kontrol kerdi, ey ra ki kağıti pers kerdê, Emri xafılde dabançey xo anto, adır nao polisê ra, erme ra kerdo dırbetın (bırindar). Nae sera ki polisê bini nao Enis Emri ra, o kışto. Saeta ke nao pıra, merrednao erd ra, polisan pê tenefuso suni kerdo ke ey weş kerê. Rêça engıştanê (bêçıkanê) cı ra tesbit biyo ke merdumo kışiyae Enis Emriyo. Vanê, oyo Fransa sera be trene ameo İtalya. Poliso ke erme ra biyo dırbetın (darbıcêyın), tehlıkeo heyati de niyo.

 

Sawciyê Almanya’ê Pêrıne ewro (roca yeniye) saete 13:30 de (saeta Ewropa miyanêne) beyanê dewesi de ard a zıwan ke êyê merdena Emri ra dıme ki na dewa teqib kerê, rêçan bıramê; beno ke torrê nê şebekey terori bıbo, êyê kewnê a peştdaoğan dıme.

 

Se bi bi?

Vızêr nê betırperarey 19ê Gağandi (Zımıstania Verêne), Berlin de, bazarê Noeli de merdumê dê nêzaniyaey pê yew TIR  ramıti bi qefley insanan u holıkan ser, 12 teni kışti. Ey ra aver ki Emri o TIRê Polonya remnao, şoferê TIRi ki pê dabançe nao pıra, kışto.

Polisê Almani sıfte yew multeciyo Pakıstanıc tepışti bi, eke veciya werte ke o niyo, anci verda ra. Tepeya kabinê TIRi de kağıt u rêçê (şopê) engıştanê Enis Emri ameyê diyene.

 

Senên Almanya de mendo?

Enis Emri Tunıs ra multeci ameo Almanya. Muracatê ey’ê iltıca red biyo. Lista dewlete de İslamisto tehlıkeyın tayin biyo, labelê anci ki peyser nêrışto, Almanya de mendo.

Amnanê 2015ıne Emri İtalya ra multeci ameo Almanya, muracat de ey xo Mısırıco siyasiyo teqibbiyae dao şınasnaene (nas kerdene). Hıni aseno ke ey Ewropa de be taê kamiyan (huwiyetan) lewiyao. Temuzê 2016ıne de o gırewto hepısê teberê sindori kerdene. Oyo ke kağıtê ey Tunıs ra kemi biyê u dairanê dewleta Tunısi  ki o hemwelat (vatandaş) qebul nêkerdo, dairanê Almanya nêşao ey peyser bırışo (bıerşawo). Dairan zanao ke Emri hem İtalya de hepıs de mendo u Almanya de ki dosyay ey’a sucan perç u puf biya, bes nêbiyaena delilan ver nêşao zêde theba bıkero.

Nê weqati ra tepeya wezirê Almanya’ê karanê zerrey (içişleri bakanı) De Maizière qailo qanunanê teber kerdene taêna zıxm (sıqi) kero. 

 

 

 

 




Bınge: http://www.tagesschau.de/

Editör: Mesut Asmên Keskin

Na xebere 667 rêy amê wendene

Etiketi :

FACEBOOK FIKIRNAYİŞ
FIKIRNAYİŞ

DINYA XEBERÊ BİNİ

YUKARI