Bugun...



Şerê Suriya: Damako Helebo...
Tarıx: 09-01-2014 22:48:21 + -


Heleb... Ma ebe hesreta Helebi bime pil. Şarê ma verde ra şiyo Heleb amo. Malê xo, dawarê xo berdo uja roto; purti ra bıjê rê hatani hacêtanê desti, çiyo rınd, çiyo qimetli Heleb ra hêrino. Helebi hewnê ma, şanıkhê ma xemelnê; ma pêrine waşto khe rojê nınga ma re Heleb kuyo. O Helebo rındek ewro wertê gon u gonaşiri de mendo, ewro ebe khula gırane naleno. O Helebo delali ewro koke ra rıjino, verê çımanê insanatêni de beno xırabe. Hêfê to sukhe...


Şerê Suriya: Damako Helebo...

Heleb... Ma ebe hesreta Helebi bime pil. Şarê ma verde ra şiyo Heleb amo. Malê xo, dawarê xo berdo uja roto; purti ra bıjê rê hatani hacêtanê desti, çiyo rınd, çiyo qimetli Heleb ra hêrino. Helebi hewnê ma, şanıkhê ma xemelnê; ma pêrine waşto khe rojê nınga ma re Heleb kuyo. O Helebo rındek ewro wertê gon u gonaşiri de mendo, ewro ebe khula gırane naleno. O Helebo delali ewro koke ra rıjino, verê çımanê insanatêni de beno xırabe. Hêfê to sukhe...

 

Heleb bi qıdagerınê Wısarê Erebi. Wısaro Ereb khe zımıstanê 2011ine de rêşt Suriya, o taw kesi na jüye teğmin nêkerdêne. Verê Suriya, dewletê Erebê bini ki bibi tê ser u tê bıne ra, gelê tena de rejimi vurya bi. Mısır de rejimê Husni Bımbarekiyo vist u phonc serên wertê hirê hefta de dêmdiya; Libya de rejimê Memır Qeddafiyo çewres serên onciya wertê dirê aşma de dêmdiya. Qeddafi be lajê xüyê pili ra amêy kiştene, lajê xüyo qıji ki weşe weş ame guretene.

 

Çawo khe dore amê Suriya, herkesi wetrê khe, rejimê Çê Esadiyo çewres serêni ki paa nêmaneno, ebe telqa Wısarê Erebi axriye de o ki rıjino. Çiyo khe ma pêrine xovira kerdibi uyo khe, Suriya zê dewletanê Erebanê bina nêbiye. Suriya wertê dewletanê xurtanê dınya de caê gulaşe biye. Heto jü de İran-Urız-Çin, heto bin de Ameriqa-Ewrupa-Tırkiya; nê hurdmina bloqê zınari Suriya de amênê tê düşt. No şer düri ra zê şerê zerê Suriya aseno, feqet isan khe nezdi ra niyado; êê khe şer kenê, nê dewletê zınarê. Ekhe ê qe werte nêkewtêne, mesela nıkha rewêna bibi safi.

 

Şarê Suriya vırêndiye ebe nermêni vengê xo kerd berz. Feqet rejimê Çê Esadi rejimê de hêni gonewer bi khe, o vengo nerm ebe kiştene bırna. Protestoyê qomi ebe adır kerdena esker u polisanê rejimi çariyay re gola goni. Rejimi qe mısadê çiyê nêda qomi. Ebe na qeyde game be game protestoy bi radiqal, qomi ki êndi pıra pıra dest êşt tıfanga. Heto bin ra ki muxalefetê Suriya ame şênkerdene u dewletanê dormi ra pışti waşte. Wertê dirê aşma de ê protestoy şi, hurêndiya dina de şerê de bêeman kewt kar.

 

Dae ra tepya dewletê dormi ki kewti werte. Xusısi Tırkiya gelê pışti dê muxalefeti; şerkerdoğê muxalefeti ardi Tırkiya de êrdım kerdi, hezimetê çek u silay day cı, pıştiya lojistikhe dê cı. Tırkiya wetrê khe rejimê Esadi wertê dirê hefta de dêmdino. Nêzantê khe Urız u Çini pıştiya Esadi de rê. Ameriqa u Ewrupa ki virêndiye hewes kerd khe wertê şeri kuyê, pêyjo niyada khe şer beno re derg, nafa ki xo fişt düri. Dewletê rojağway khe düri vındeti, muxalefetê Suriya ki pıra pıra verva bısılmananê radiqala şi. Hatani caê, şerê muxalefetê Suriya herkesi çım de şerê de heq bi, feqet ekhe bısılmanê radiqali kewti wertê şeri u dest bı sarebırnayêna isana kerd, o taw êndi herçi bi tê ser u tê bıne ra.

 

Şerê Suriya hirê seriyo khe dewam keno. Qasê nêmê de welati rejimi deste ro, nêmo bini ki grubanê bısılmana u Kurda deste ro. Rejim, rıjiyayêne niya vındero, roj bı roj destê xo keno hira. Muxalefetê Suriya biyo letê u lewarê, xo werte de şer keno, Kurda zımê welati de otonomi ilan kerdo, verva dewlete şonê, bısılmananê radiqala ki caanê bınê destê xo de şeriat ilan kerdo.

 

Şerê suriya zê gılêndıka rêsi aleziyo. Aa khe bena ebe qomê Suriya bena. Qom qıj ra pil ra wertê gon u gonaşiri de mendo, ver vırada ra biyo vıla, xo rê kewto re çol u çolıstana...

 




Bınge: www.zazakikozmos.com

Editör: Cemal Atila

Na xebere 4408 rêy amê wendene

FACEBOOK FIKIRNAYİŞ
FIKIRNAYİŞ

DINYA XEBERÊ BİNİ

YUKARI