Bugun...



Qısle de Qereqol Ser Estene Sero
Tarıx: 25-08-2016 08:50:56 Newebiyayiş : 25-08-2016 15:35:56 + -


Nuştoğê pela ma Zazakikozmos.com roca ke gerilau eşti bi qereqolê Qısley (Nazımiya, Qızılkilise) ser, o ki dewa xo de biyo. A têkewtene sero dewe u qereqol de çı amo ser de, ma rê nusna.


Qısle de Qereqol Ser Estene Sero

Nıka xo ve xo van ke, no senê zulmo, ison çutır hardê xo de, welatê xo de bese nêkeno weşiya xo bıramo?
İson çutır weşiya ma u piyê xo miaro hurendi, bese mekero bêro, hardo ke sero ame riyê dina, bınê ê hardi de tey wedaro?
Ne tike, ne ki merde, vanê sıma nêwazeme na hardi ser de.
Sıma ke musada kenê, ez derde rê xo sıma de bare bıkerine?

 


Deva devê serrêo ke waa mı nêwesa. Ma xeylê toxtoru ra fetelnê, tedawi, ilaz, thawa ki mefer nekerd. Nêweşiye dest heni biye, heni biye ke tı vana, belka kerda mezele, veta. To ke tey nia dêne, to nêvatêne ke na cênca, to vatêne, belka kokıma çondae serra. Waa mı xeylê est ra xo ver, hama derd bêdermano. Çhik paniso, o ondêro qanser bıvêso, kes nêşkino ke na zuqmati riyê na hardi sera wedaro. Desta sodıri waa mı çê xo bar kerd, kote ra kewranu, şiye. “Sıma ke cendegê mı welat de kerd bınê hardi ra, ez ben thayrê, nison gılê dar u beri ra, welatê xo de, eve zonê xo wanen. Efkarê xo, efkarê na kemer u kuçi, efkarê na hard u asmêni kenu raji. ” Waa xo ben welat de danu we, van, “waê, endi waêni u bıraêni qediye. . . ”

 

 

Ma ostomola dewe rê têlefon kerd, ma va ke, “ortam çutıro, rae rakerdiya? Ma roza phosemiye cınaza ame. ” Va ke, “na deqa sukıtiya. Hama satêna se beno, nêzoneme. O waxt sıma xevere belediya Qısli (Nazmiya) derê, kepçe burusno, şêro dewe de mezele bıkıno. ” Ma belediya Ostomoli ra areve kompila kerdo, peroz vejime ra rae, yeme welat.
Ma ke Ostomol’a bime rast, soferê arevi ra va ke, raa Erzıngani tenêna nejdiya, raa Erzıngani ra şêrime. Qevul nêkerd, va ke, raa Derê Pulemuriye de arevu vêsnenê. Uza yasağo, ma uza ra nêsome. Raa Qeyseriye ra areve sono, nêsono ke ondêra rae ma ver nêvejiye. Neyse, ma ve weşiye sate 11ye de Qısle de vejiyayme. Cınaza kerde arevê belediya Qısli, cınaza ver, ma arevê bini ki dıme, ma raa dewe na ro xo fek. Ma leyê piyê mı de, waa mı darde we, weşiya waa mı berde hurendi. Dewe de malê sare bırnay vi, hêga, huy u zengeni dê. Ma roza bazare ki cemxanê Qısli de medağ da.
 

 

Ma va ke, roza dısemiye, sodır cêreme ra Ostomol. 40 ki Ostomol de, bon de vezeme.
Sono, hona lêl nêkoto, ma leyê boni de, way, bıray, daasê teni tevera qesey keme. Dewu jüvin’nê salıx dame, namê kou jüvin’a pers keme. Ma nia da ke serê ma ra çiyê koto vızıke. Bın’a lambê surê khewey vêsenê, jê barsê mêsu veng vezeno. Mendo ro ufo. Heni qayte jüvini bime. Bıraê mı va ke, “no herono, eskeriya rusno dêma ke, vanê, ça biyê top, se kenê?”
Bıraê mı va ke, “ez qereqol rê têlefon ken, no ça ma sera fişto vızıke?” 156 têlefon kerd, va ke, “ma ameyme, cınaza ma esta, verê çêweri de qesey keme, sıma çı desınde no ma sera fişto vızıke?” Neyse têlefon ra dıme heron peyser ont, berd.
 

 

Ma şime valizê xo kerd hazır, keder u hilaiye ke mebo, sodır kume rae. Rewra kotime ra. Xeylê sewe ke şiye, desta sodıri veng ame, ma va, belka qaleqol de eğitimê sodırio esker keno. Bıraê mı va ke, “no eğitim niyo, tersa mı çı ke, çatışma vejiye.”

 

Sate 4:30 de domonunê bırri (gerilla) esto ve emniyet müdürlüğüyê Qısli ser. Adır voreno. Nêthoreme ke sare vejime tever, nia derime. Tı vana, belka bılışki erzenê, heni sewq yeno, veng vejino. Bombey peqenê, sewq vejino ro erşi. Ma vışiyayme pêro. Domoni ma derê, hermeti estê. Hata sate 7:30 eve o tore dewam kerd.
 

 

Sate 8ine dıme cê vışiya. Heni werte de vengê peqaişi yeno, bina emniyeti ra dü beno berz. Sate 9ine de belediya ra anons kerd, va ke, wali ra emır amo, hata emıro newe zuzağ vejiyais do ve yasağ kerdene. Ma desınde têlevizyon kerd ra. Uza ra xevere gurete ke, jü esker kışiyo, 3 polêşi biyê dırvetıni, dırvetia jü polêşi zaf gırana. Domonunê bırri ra ki jü çêneke, ju ki lazek amo kiştene.

 

Ma jüvin’nê têlefon kerd, ala zövina keşi rê thawa biyo, nêbiyo? Va ke, “domonunê bırri çêweri sıkıtê, kotê zerre, iyê ke wayirê arevunê, arevê dinu guretê, vato, ‘havalê ma dırvetınê, inu pê beme. Sıma ke qereqol’lê têlefon bıkerê, sıma kiseme! Nêvo sıma xevere polêşi derê!’”
Wayirê arevu sonê qereqol, vanê arevê ma berd. Polêşi ki kam ke rast yeno, cênê, erzenê zerre. Ma de vanê ke, voro tü ke jimêlê, vorde tü ke herdisa. Mılet se bıkero, wertê dı adıri de mendo?!
 

 

Ma endi xorê çê de bekle keme. Vame, ala key na yasağ danê we. Ostomol de karê ma esto. Heto jü de, rae qapana, heto jü de nunê ma ki çino. De “koro pane, pak ke”.
Çımê ma têlevizyon dero, gosê ma anons dero. Ma va, belka sonde yasağ danê we. Bi ra sodır ke, yasağ we nêdardo. Ma Mamekiye (Tuncêliye) rê walilig rê têlefon kerd, va ke, “rae de mayıni estê, o ri rae qapana.” Va ke, “reyê ki cendermey rê têlefon bıkerê. Ma cendermey rê têlefon kerd, va ke, “tı ala bê qereqol, ma to de qesey keme.” Mı nufus cüzdani ve raporê merdena waa xo guret, xalê mı ki mı de ame, ma şime qereqol. Nızamiya de serê ma kerd sae, têlefonê ma guret. Esker fişt ra ma, ma berdime leyê astsubay. Va ke,

“Wayirê çêyi kamo?” Mı va ke,

“Ezune”.

“Uyo ke to de?” Mı va,

“Xalê mıno.” Va ke,

“O tevera vındero.” Oda de hirê teney astsubay roniştiyê. Ze ke dısme’ dısmeni de nia danoi mı de heni nia danê.

“To ça têlefon kerd, çı wazena?” Mı va,

“Cınaza ma biye, ma ameyme itha, ma gereke vıjêri racêrdêne Ostomol, karê ma esto, hama itha mendime. Rae key bena ra, mı va ke pers kerine.” Va ke

“Bonê sıma, o bono ke pul’a, o niyo? Vıjêri mereve de cengê bonê sıma ra teroristu qerqesuni nay ve ma ra, bombey eşti. Sıma qe nêdi?” Eve çin (kin), eve hêrs qesey kenê, ze ke ga kardi de nia dano, mı de heni nia danê. Mı va ke,

“Ma kes nêdiyo. Ma nêthorayme ke sare vejime tever. Tari bi, zulomote biye, mı kes nêdi.” Va ke, “Heroni vinena hama, desınde têlefon kena ra, vana, ‘ça ma sera fetelnenê?’ Terörişti yenê leyê sıma, têlefon nêkenê, nêvanê ‘naê itharê’. Sıma mıletê na welati xainê, gonia ma ke burê, mırd nêbenê. Sıma sarê Qısli pêro Hermeniyê, sıma pêro ki dolê Hermeniyê. Ma fênda sıma keme fênda Şirnaqi, itha kemere, kemere sero nêverdame!”
 

 

Mı ki vengê xo kerd berz, mı va ke

“to ke leyê bonê mı de diyê, to panêne. Şilao to dest de.” O jü ame ra mı ser, bar kerd ke mı ro do, ê tekê bini nêverda. Va ke,

“To ‘yardım ve yataklık’ ra dame mekeme. Kimliga mı fotokopi guret, adresa çêyi gurete.  Mı va, “danê mekeme, bıderê. Mı qe thawa ki nêkerdo.”

 

Weliyê Memedê Weli 




Editör: Weliyê Memedê Weli

Na xebere 1212 rêy amê wendene

Etiketi :

FACEBOOK FIKIRNAYİŞ
FIKIRNAYİŞ

WELAT XEBERÊ BİNİ

XEBERÊ ZÊDÊRİ WENDİYAYÊ
FIKIRBİYAYÊ PÊÊNİ
FOTO GALERİ
  • Guelê Quling (Yüzenada) - Çolig (Bingol)
    Guelê Quling (Yüzenada) - Çolig (Bingol)
  • Zımıstanê Welati
    Zımıstanê Welati
  • Çımê Muzıri
    Çımê Muzıri
  • Koê Welatê Ma
    Koê Welatê Ma
  • Mezelê Ma
    Mezelê Ma
  • Bonê Domantênya Ma
    Bonê Domantênya Ma
  1. Guelê Quling (Yüzenada) - Çolig (Bingol)
  2. Zımıstanê Welati
  3. Çımê Muzıri
  4. Koê Welatê Ma
  5. Mezelê Ma
  6. Bonê Domantênya Ma
FOTO GALERİ
YUKARI