Bugun...



Ne xêrê sıma ne serrê sıma
Tarıx: 24-06-2017 16:35:12 Newebiyayiş : 25-06-2017 16:46:12 + -


Biyenanê rocanê peyênan sero...


Ne xêrê sıma ne serrê sıma

Tırkiya de qanunê geme (Orman) esto, bê xevera dewlete kes nêşkino geme ra çiyê bıbırrno. To ke bırrna, eke kota ra dest, cırmê xo gırano, to benê, erzenê zerre. Eke qanunê era dare estene (idam) ke we medardêne, belkia ki iyê ke geme de daru bırrnenê, ê estêne ra dare.

Usaro, welat de amnono. Dina biya khewiye. Kamıji heti ser ke şêr kena, vana, itha ceneto, daêna rındeko. Çımê to pa manenê, tı bıjina cı. Hama taê cau de nia dana, bırr pêro tı vana belkia vêso. Purr pa çino, rut u rupalo. Oxro ke tefturi purrê velgi pêro werdo, sano dare, kerdo koçên. Dewızun’a pers kerd, dewıji vane kê, “Dewlete theyarun’a teftur ana, erzena gemu, vana, va teftur purr buro, va gemi koçên bê ke, caê de thawa ke xo lewna, ma bivênime.”

Eke bi ammon, kounê Desımi ra, gemunê Dêsımi ra du beno berz, kıle vejina ro erşi. Mevaze ke theyarey gemu sera fetelinê, awe anê, adır saynenê we. Theyare ke icad bi, nêbi, Dewleta Tırkiya de adır vornenê, bombu vornenê Dêsım ser. Qalê derdu mekerime, derdi gıranê…

 

Bêrê piya nia derime, ala wertê na 20 roze de Dêsım de se biyo:

- 14ê na asme (Hezirane) de, Derê Pılemoriye de, hetê Zağgi de, sarê Dêsımi ra 6 olvoji yenê fekê çhemi mosu pê bıjêrê, xo rê piknik bıkerê, heron yeno, ca beli keno. Kobra helikoptere yena, uza ê 6 tenu sanena qerqesunu ver. Xevere danê ambulansi, yeno, iyê ke biyê dırvetıni, bero xestırxane. Taine bene Xarpêt, taine benê Erzıngan. Ülküciyê Erzıngani ke xevere cênê ke dırvetınu anê Erzıngan, kunê vırêniya ambulanşi, ambulanşi sanenê kemeru ver, vanê, “ma teroristu itha nêwazeme”. Ambulans Erzıngan nêkuno, sono Erzurum.

-Qısle (Nazmiya, Qızılkilise) de Dewa Gerise de cendermey ve Pkk ra kunê ra têwerte, jü esker kişino, 2 eskeri benê dırvetıni.


-Necmettin Yılmaz Urfa (Rıha) Sêwrege de malımêni keno. Gumuşxane ra beno. Ma u piyê xo Gumuşxane de benê. Mektev ke qedino, beno tatil, sono ke şêro leyê ma u piyê xo. Raa Pılemoriye de Pkk kuno vırêniye, arevey vêsnenê, malımi ki kisenê. Pkk vano, “malımi ajanêni kerdêne, caê ma vatêne, ma ixbar kerdêne, ma coka kışt.”*

Dı heti, dı xısmi ke jüvini de koti mereve, vanê, hervo, hurdemêna heti ki eve çhekunê. Endi kami ra çı ke ame. Kes kistene nêwazeno,  merdene rê ki sa nêbeno. Uyo ke merdene rê beno sa, isanênia xo boncê ve dare. Kiştena malıme rê qe kes ki sa nêbi.

Kamıji het de benê, bıbê, ison merdene nêwazeno, kuno ra cêncun u xortu ver. Merdena cêncu dana zerrê isoni daznena.


-Raa Pılemoriye Erzıngani de hete Hêgaê Dergi de Pkk rae bırrneno, tıro ke eve komır bar kerdo, kunê vırêniye, vındarnenê, soferi anê war, tıri vêsnenê.

 

Hal u meselê welatê ma niaro, 40 serra ke
Can vêseno
Dar vêseno
Kemer vêseno.
Tern vêseno, husk vêseno…

 

Dêsım de şiya na hervi de, oncia ki karo rındek ki yeno kerdene. 2000 ya nat Dêsım de festival yeno guretene, “Dersim Munzur Kültür ve Doğa Festivali”
Her serre belediya Suka Dêsımi/Mamekiye na festivali rê çêwaêni kerdêne. Belediyunê qezau ki phoşti dêne ve cı. Sermiyanê Belediya Dêsımi Mehmet Ali Buli 2016 ra nat wejifa ra guret, hona hepıs dero. Hurendia dey de qeyum tayin kerd. Nıka belediya Dêsımi rê qeyum sermiyanêni keno. No teyna Dêsım de niaro.

 

Festivalê Dêsımi hata nıka sarê Dêsımi serva idarê belediya xo kam ke çinıto, selahiyet ke do ve kami, eve inu ra pia festival gureto de.
Esmer festivalê Dêsımi dewlete (qeyum) vana, ‘ez vırazen.’ Xoji ve ma bo!
-Heto jü de adır gemu ke, gemu eve adır bıvêsne
-Heto jü de Zonê Dêsımi, kamiya Dêsımi inkar ke
-Heto jü de vırêniya awe bıjê, Dêsım wertê awe de bıxenekne,
-Heto jü de deru jüa ke, dar u ber, thayr u thuri bêawe verde, bıkise
-Heto jü de tefturê xıravıni bia, gemu ra mağ ke.
-Heto jü de kou, dar u beri eve bombunê kimyasalun’a bomba ke..

 

Keşi ki welatê xo de nêwazeme.

 

Destê xo welatê ma sera boncê!

 

Ne xêrê sıma, ne serrê sıma…


__________________________

* Kiştena malımi sero hona tam tesdiq çino. 1-2 xeberi veciyay ke tede vanê, malım nêkişiyo, piyê malımi vato, qemısê lacê mı mebê.




Bınge: Veli Kişioğlu

Editör: Mesut Asmên Keskin

Na xebere 132 rêy amê wendene

Etiketi :

FACEBOOK FIKIRNAYİŞ
FIKIRNAYİŞ

SİYASET XEBERÊ BİNİ

XEBERÊ ZÊDÊRİ WENDİYAYÊ
FIKIRBİYAYÊ PÊÊNİ
FOTO GALERİ
  • Guelê Quling (Yüzenada) - Çolig (Bingol)
    Guelê Quling (Yüzenada) - Çolig (Bingol)
  • Zımıstanê Welati
    Zımıstanê Welati
  • Çımê Muzıri
    Çımê Muzıri
  • Koê Welatê Ma
    Koê Welatê Ma
  • Mezelê Ma
    Mezelê Ma
  • Bonê Domantênya Ma
    Bonê Domantênya Ma
  1. Guelê Quling (Yüzenada) - Çolig (Bingol)
  2. Zımıstanê Welati
  3. Çımê Muzıri
  4. Koê Welatê Ma
  5. Mezelê Ma
  6. Bonê Domantênya Ma
FOTO GALERİ
YUKARI