Bugun...



Mersin de Özgecan Aslane hetê ulkiçiyu ra kişiye u amê vêsnaene
Tarıx: 15-02-2015 23:38:02 + -


Mersin de Özgecan Aslana Dêsımıce hetê ulkiçiyu ra kişiye u amê vêsnaene. Telebiya (şagırda) universıti Özgecan Aslana Dêsımıca vist serriya ke hirê rocio vindibiyaiye biye, ailê xo ro cı cêrêne; meytê ae jü dere de vêniya ke amo vêsnaene. Dı qetilê ulkiçiyê (mefkurekari) ke pê cêriyay, cı ra tepia, qetilê hirêyino ke firari bi, o ki na sewe ame pê guretene.


Mersin de Özgecan Aslane hetê ulkiçiyu ra kişiye u amê vêsnaene

Özgecan Aslana ke Mersin – Tarsus de weşiya xo ramıtêne, Universıtê  Çaği, qısmê Psikolociye de telebiya sınıfê 1ine biye. Eke roca çarsemiye (11.02.2015) çê xo nêreşto cı, şiyo, pers fişto polêsi ra. A sewe polês cêro Özgecane, labelê rocê raver sande, soferê minibusi Suphi A. (26), oyo ke mabênê Edene u Mersini de raywanu ano, beno, nuqtê cendermu de vındeto, cı ra rae pers kerda. Eke minibus raa hetê geme gırota, cendermu egle kerdo, tey kerdo sae. Minibus de piyê Suphi Necmettin A. (50) u Fatih G. (20) ki tey biyê. Eke rêça goni diya, inu cendermu ra vato, raywanu wertê xo de da pêro, uca ra menda. Nae sero i 3 sık kerdey serbest verdê ra.

 

Eke malumatê vindibiyaena Özgecan Aslane reşto cendermu, inu reyna minibus kerd sae, tede sapqa çêneke diye. Piyê Özgecane Memedi sapqa çêna xo nas kerde. Eke heni vato, Necmettin A. u Fatih G.o ke unti sorği – sual ver, inu na ro xo ke çêneka qıce kardi kerda, meytê ae ki benzin verdo ra ser, vêsno, tepia ki dewa Çamalani de, nejdiyê mezelxanê Almanu de, eşto hurendia Derê Cini. Cao ke inu musno ra cı, meytê do vêsae vêniya.

 

İfadawa ke sık kerdau dê, cı ra gore Özgecane nişta minibusê Suphi A. Albaza awa ke Tarsus de nisena ro, uca ama war, Özgecane tek raywane (yolçiye) menda. Sofer Suphi A. ke raa şiae D-400 de raa xo vurna, Özgecane ke sık berdo cı, soferi de no werê. Eke minibus cao isız de vındarno, xo cerrebno pıro, Özgecane qazê biberi veto, ver kerdo ra cı ke ero xo bıpiyo. Sureo ke Özgecane eşto ra xo ver, riyê Suphi A. pencurrık kerdo; Suphi A. ki kardi veta, têdıma kerda çêneke de. Dıma ey çüyo asınên gıroto, do çêneke ro, pê kişta. Tepia meyt ra pia cêro ra Tarsus ser, piyê xo Necmettin u Fatih G. ra phışti waşta. İ ke amê, pia meyt berdo, vêsno, eşto Derê Cini.

Anadoliye de ki, Ewropa de ki na kiştena bêbexte sero mıleto be goni u qeyret zaf qariya, peyser perra, mitingi vıraşti, meyda sosyale de na xebere her ca ra biye vıla. 




Editör: Yenok Solmaz - Asmêno Bêwayir

Na xebere 1126 rêy amê wendene

Etiketi :

FACEBOOK FIKIRNAYİŞ
FIKIRNAYİŞ

TIRKİYA XEBERÊ BİNİ

YUKARI