Bugun...



Hranti dıma... (V. Kişioğlu)
Tarıx: 20-01-2017 01:11:59 Newebiyayiş : 20-01-2017 01:17:59 + -


Ez ewro wazen ke tenê Hrant Dinki sero çiyê bınusnine. Serva Hrant Dinki xeylê çi ame vatene, xeylê nusna; va bo ewro ki Zazaki bıra Hranti sero çor çekuyu ma bınusnime.


Hranti dıma... (V. Kişioğlu)

Hranti dıma

 

Hrant Hermeni bi, Malatya de amey vi riyê dina. Ostomol de yetimxane de bi pil. Xeylê saredez di. Universite wend, bi çhepçi, zewejiya, bi wayirê domonu. Hrant ki jê ma ison bi, dı lıngê xo, dı çımê xo biy. Hama Hrant baqıl bi. Zerrevêsaê hardê xo bi. Ey mıletê xo ra, mıletê dina ra, pêrüne ra ki has kerdêne. Na dewlete de eke hem Hermeni, hem çhepçi, hem sosyalist, hem isana, bêzırde pırnıkunê isoni ra kenê, sıto ke to moa xo ra lıto, pırnıkunê to ra anê.

 

Dewleta ke sero weşiya xo rameno, serva problemunê dewlete xeylê fıkıriya, qezeta vete, name Agos na ve pa. Manê Agosi, zonê ma de hêga de “hagose” esta, rêça sırşi, awa. Tırkiya de bınê honde zulmê dewlete de, serva tharva (derba) Hermeni qeseyê ke kes hata nıka nêthora vazo, ey qezeta xo de pêro ardi ra zun. Ey ve diaspora Hermeniyu ra ki têsarê nêkerdêne. Vatêne, diaspora phoştia xo sana Amılka u Ewropa, phoştia geme ra çêranu kunê. Na mesela eve dısmanaêni ramıtene ra hal nêbena.

 

Hranti vatêne ke, “Tırki xo hurendia Hermeni kerê; Hermeniy ki xo hurendia Tırki kerê, hissiyatê şovenizmi xo miarê, bıfıkıriyê: Khalıkunê ma se kerdo??”

 

Hama Osmanıji ra, İttıhad u Tereqqi ve Cumhuriyet ra nat, hata roza ewroyêne dewlete siyasetê xo jür u ilava u inkar sero ardo arê. Tırkiya de politika jü dini, jü mıleti, jü bayrağe waste ke bero sere. Eve politika qırkerdene, kaf ardene ser siyaset ramıt. 100 serre verda ra, dewlete hona politika ittıhad u tereqqi ra vaz nêbena.

 

Ma sarê Dêsımu ve Hermeniyu ra ciranê hazar-serreyme. Ma dırvetia jüvini ra jüvini nas keme. Ma ortağê derdê jüvinime. Tornê khalıkunê dırvetınunime. Ma key ke verê xo hetê jüvin’a kerd, dırvetia jüvini rê beme melem. Belka o waxt na xeyma şiae dırrneme, erzeme, tharva ma ra goni endi cê vışina, nêsona, belka o waxt tharva ma seket gırê dana.

 

Bıra Hrant, tı na dewlete de tharva Hermeni sero ne qırvano vırêna, ne ki qırvano peyêna. Hama tı nae bızone ke to ra dıme na tharva Hermeni sero her keşi kıla xo nê ro, pers kerd pa.

 

Cınaza to de Hermeniy ve Anadolızunê çepçiyun u demokratun’a pêro bi jü, eve ju fek, va ke “Ma pêro ki Hrantime, ma pêro ki Hermenime!”

Bıra, tı xırt biya, tı çhêr biya, tı merdena xo ra nêtersa, namê to coka na dina ra nêbırriya.

Mordemo xırt ne şêro dosti ra, ne ki şêro dısmeni ra. 

 

Veli Kişioğlu




Editör: Veli Kişioğlu

Na xebere 334 rêy amê wendene

Etiketi :

FACEBOOK FIKIRNAYİŞ
FIKIRNAYİŞ

TIRKİYA XEBERÊ BİNİ

YUKARI