Bugun...



Cemil Qoçgiri ra Zazaki rê albumo newe u jû şewe
Tarıx: 30-01-2017 04:30:29 Newebiyayiş : 16-02-2017 00:14:29 + -


Albumê senatkar Cemîl Qoçgîrî’yo peyên “Zalâl” bıne ra be Zazaki veciya. Roca bazare, 29.01.2017, sûka Almanya Mainz de konserê nasdaena nê albumi bi.


Cemil Qoçgiri ra Zazaki rê albumo newe u jû şewe

Senatkar ke sıfte be namey ‘Cemil Koçgün’i nas biyêne, tepeya namey pey vırna, kerd “Qoçgîrî”. Keye (çê) ra zıwanê xo Kırdaskiyo, be xo ki mıntıqay Qoçgiriye, yani İmranli u Zera (Sêvaz) rao, kokê/rêçıkê keyey ey ki Dêsım rao. Be xo Almanya de ameo dınya u anci ki kok u rêçıkê xo dıme rao. Heta nıka ey albumanê xo “İnsan-o Neçar”, “Heya” u “Hîva Zerî” de zafêr Kırdaski u Tırki vatêne, labelê ca daêne Zazaki ki. Albuman u konseranê Mıkail Aslani de ki name u veng u ğeyretê ey vêreno. Emma, no albumê xo’yo newe “Zalâl”o ke par 2016ıne de veciya, bıne ra, %100 Zazakiyo (Kırmancki, Dımılki, Zonê Ma), Zazakiyê Pulurio (Dêsım, Ovacığe).

 

Be nê albumê newey o wazeno ke hometa dınya balê xo bıdo a Zazaki, oyo ke ˗senên ke raporê UNESCOy de ki vêreno- bınê tehlıkey dero. Ey na ri ra no album kerdo zımetê Zazaki. Kılamê (lawıki/deyri/sıwari) album “Zalâl”i ê nuskar u cıgeyraoğo Pulurıc Doğan Munzuroğliyê. Qeydanê muziki sero Cemili ra piya gırweyaê, no album ardo meydan.

Qısey kılaman ki embazan ra piya çarnaê Tırki, Almanki u İngılızki ki wa alem ki zerrekê kılaman ra haydar bo. Wa no zıwano ke riyê politikay dewleta Tırkiya’wa zordar u tesfiyekare ra ameo tayışê xo vira biyaene, vındi mebo. Zey wahêrê nê zıwani, zıwan be xo ki zulım diyo, cênosid diyo, zıwano xoser biyaena cı inkar biya, qıymet cı nêdao ke qıseykeranê nê zıwani çım de ki endi mıteber nêbi bi. Her çıqas de hal weziyetê zıwani hende weş nêaso ki, ğeyretê hınanêni u hewesê gêncan u cıwanan omıd dano ma ke no zıwan salê pay ra bımano. Şarê Zazayan de, bılxassa Elewiyan de muzik caê do zaf mıhim gêno; qas be itıqad de, eke cem gênê de, be thembur u tewt veng’a Heqi danê. Muzik bal u meylê gêncan ki zaf anceno. Rolê hunermendan na bare de zaf mıhimo.

 

Roca bazare, 29.01.2017ıne de sûka Almanya Mainz de, caê konseri Frankfurter Hof de nasdaena albumê newey biye. Salon bi bi pırr, ca nêmendi bi. Konseri ke ver kerd cı, anonsê Almanki de ame vatene ke, Zazaki zıwanêyo ke bınê tehlıkey dero u na sebet ra no album kerdo zımetê cı. Letey konseri’o verên de xora kılamanê Zazaki ca gırewt. Dı lawıkan de Mıkail Aslan ki ame sehne, be qırnata tewrê cı bi. Vokaliste ki Dilan Tope biye. Ares ra tepeya letey dıyıne de Zazaki ra serkewte Kırdaski (Kurmanci, Kurdkiyê Zımey) u jû ki Ermenki ra lawıki vati. Lawıka peyêne de reyna Dilan Tope, jû ki Lale Koçgüne, Uğur Canpolat pêro be defe veciyay sehne, piya cenıte.

Mabeynê lawıkan de ki qıymetê zıwanan u kulturanê na dınya u insanetine sero mesacê hewli day u ard a zıwan ke, muzik binatê kulturan de pırdê do xırto. Muzik, wayin u bırayina şaran sero cematkerdoğo.




Editör: Mesut Asmên Keskin

Na xebere 1359 rêy amê wendene

Etiketi :

FACEBOOK FIKIRNAYİŞ
FIKIRNAYİŞ

ZONÊ MA XEBERÊ BİNİ

XEBERÊ ZÊDÊRİ WENDİYAYÊ
FIKIRBİYAYÊ PÊÊNİ
FOTO GALERİ
  • Guelê Quling (Yüzenada) - Çolig (Bingol)
    Guelê Quling (Yüzenada) - Çolig (Bingol)
  • Zımıstanê Welati
    Zımıstanê Welati
  • Çımê Muzıri
    Çımê Muzıri
  • Koê Welatê Ma
    Koê Welatê Ma
  • Mezelê Ma
    Mezelê Ma
  • Bonê Domantênya Ma
    Bonê Domantênya Ma
  1. Guelê Quling (Yüzenada) - Çolig (Bingol)
  2. Zımıstanê Welati
  3. Çımê Muzıri
  4. Koê Welatê Ma
  5. Mezelê Ma
  6. Bonê Domantênya Ma
FOTO GALERİ
YUKARI