Bugun...



Beyanatê Projê Zagoni (Kulturi): Dêrsim – Qoçgiriye – Qerebêl
Tarıx: 28-03-2017 02:05:28 Newebiyayiş : 04-04-2017 15:38:28 + -


Eno cêr kometey projey ra beyanatê (venganey) projey kulturio.


Beyanatê Projê Zagoni (Kulturi): Dêrsim – Qoçgiriye – Qerebêl

https://www.facebook.com/groups/1830097650611459/?ref=ts&fref=ts 

Beyanatê medya u sılaiya 08.04. 2017

 

Dêrsim – Qoçgiriye – Qerebêl , Projê Zagoni 2017

 

Na proje zonê ma rê gamê da zaf ebe faydiya hewla. İsviçre, Almanya u Estamol ra taê nuskar u akademiysen u senatkaru ra, albazê ke zerri ra gurinê, inu ra pia no proje yeno hurendi. Sermiyanê projey Tevfik Şahini nae ra raver ki ebe albazanê xo ra imza xo eşta 3 projanê zon u kulturê sarê ma.

Ebe Projê Kulturi Dêsım – Qoçgiriye – Qerebêli 4 kıtabi vecinê:


1. Lawıkê Qerebêli: Hetê Zera u Qangali (Sêvaz) ra lawıki (kılami, deyri); leteo jêde Zazaki, taê ki Tırki u Kırdaski. Arêker: Tevfik Şahin (Cefo Çarekız)

 

2. Lawıkê Dêsımi: Hetê zerrê Dêsımi (Mamekiye, Xozat, Ovacığe, Pılemoriye, Qısle, Mazgerd) ra lawık u şüari; ni ki leteo jêde ebe Zazakiyê (Kırmanckiyê), taê ki Kırdaski. Arêker: Cemal Taş
Nê hurdımêna kıtabu de taê lawıki ki ebe nota, ebe resmun u vengê kokımu CD de vecinê.


3. Kıtabê musnaena Zazaki “Şıma Zazaki zanenê?”, Mesut Asmên Keskini ra. No kıtab Zazakiyê do standardo ke ebe metodo ilmiyo, ey salıx dano; ebe arazekerdena Tırki vecino. Çıke her mıntıqa Zazaki ra, her caê welati ra va kes Zazaki bımuso u mektebu de ki rocê bêro musaene. No kıtab raver Gağanê (Zımıstania Verêne) 2012yine de Almanya/İsviçre de ebe Almanki serba musaena Zazakiyê Pılemoriye/Erzıngani bınê projê “Kulturprojekt Zazaki-Lehrbuch”i ame vetene. Kıtab wertê dı serri de qediya, na ri ra 2016ine de ki Almanya de çapê dıdine (2. baskı) veciya.


4. Domanu rê / Qıcun rê Alfabê Zazaki, zonzanoğ Yaşar Aratemüri ra. No kıtabo hurdi dı feku de vecino: Fekê Dêsımi u Fekê Çewligi (Zerrê Bingoli). Kıtab ebe resmanê rengınu vecino ke domani/qıci alfabê zonê xo ebe kay u kêfi bımusê.

 

Ma çıqa(s) ke desteg u phışti bıdime zon u kulturê xo, umıdê ma ki jêdino ke no zon u kultur salê pay ra bımano; va azo (neslo) ke ma ra peyda beno, ebe zon u kulturê xo ki pil bo.

 

No proje roca semiye 8ê Nisane 2017ine de, Estamol, Şişli Kültür Merkezi de yeno nas daene. A roce nuskar u senatkar u akademisyenê sarê ma, qeyretkerdoğ u gurekarê nê projey pêro yenê têare, proje u halê zon u kulturê ma sero qesey kenê; senatkar u sairê ma lawıkun u kılamu vanê. Sıma rê ki sılaiya/dawetiyawa. Dosya de ki tenê malumat esto.

 

Konser: 

Seme, 8ê Nisane 2017

Sate 19:00 – 22:00 

Şişli Kent Kültür Merkezi - İstanbul de yeno hurendi.

 

Sair u senatkari:

-Metin Kemal Kahraman

-Gülseven Medar

- Komela Muzike Bedestan

- Qemero Areyiz

- Meta Guluko

Şixo

- Xalıka Xane

 

Zerre ra sıma dawetê  konserê projê Dêsımi – Qocgiriye – Qerebêli 2017 kenime.

 

Program u repertuar: Lawıkê Dêsımi u yê Qerebêli ebe kemane u thembur ra konserê Dêsımi u Qoçgiriye huzır ano ra mordemi ser. Na konser her keşi rê akerdeo.

Daêna zêde malumat: www.facebook.com: Dêsım – Qoçgiriye – Qerebêl Halk Ezgileri  Kültür Projesi


 
Ma wazenime ke roca semiye (peyê yeni), 8ê Nisane 2017 de ebe sa biyaene ra sıma dawetê konserê Dêsımi/Qoçgiriye bıkerime u dıma ki lawıkanê Dêsımi u yê Qerebêli serba sıma teqdim bıkerime.  Konser de ebe qeydanê wesu ra ma raya hardê dewrêşi de yazi u yabani ser sonime. Dıma ki ebe kêfweşi u nermiye ra lawıkanê welati gos danime.
  
Ebe thembur u kemane ra, Metin Kemal Kahraman raver heser u hesrete u dıma ki gosanê mordemi kenê hesar: Qeydeyê ke vacinê, zerreweşiye u ebe nermiye yenê ra zon. Jê vilıkanê usari reng be reng u jê sewa amnani ki ebe lawıku ra zerrê mordemi beno germ. 

 

 
Tepia ebe sewda zerri, rındeki u zerreweşiye ra lawıki yenê ra zon. Lawıkanê Dêsımi (Zazaki) u yê Qoçgiriye ra pia, lawıkê Kırdaşki, Ermenki u Tırki ki serba gosedaru vacinê.  Bêkemiye u ebe qeyret ra… Konserê Dêsımi – Qoçgiriye serba sıma yeno hurendi. Ma serba sıma zerreweşi u kêfweşiye wazenime. Ebe vılakerdena na sılaiye ra, na konser de ebe heycan ra, ma ki kunime firkepêçi. Ebe zerreweşiye ra, ma ki raya sıma pinime! Konserê welati de sıma sare u cımanê ma ser xêr amê!
  

 

Mesuldarê projey: Cemal Taş,Tevfik Şahin, Mesut Asmen Keskin, Pınar Polat, Fevzi Kaya, Sunal Erdoğan u Bülent Çatalkaya.

 

 

Konser: Seme, 8ê Nisane 2017 - sate 19:00 – 22:00 Salone Şişli Kültür Merkezi - İstanbul de yeno hurendi.




Bınge: Tevfik Şahin

Editör: Mesut Asmên Keskin

Na xebere 474 rêy amê wendene

Etiketi :

FACEBOOK FIKIRNAYİŞ
FIKIRNAYİŞ

ZONÊ MA XEBERÊ BİNİ

YUKARI